- მთელი დღეა ეროვნული დროშები ქვეყნის მთელს ტერიტორიაზე დაშვებულია - საქართველო 13 ივნისის ღამეს დაღუპულ ადამიანებს გლოვობს. ამ დროისთვის დადასტურებულად დაღუპულია 13 ადამიანი, მაშველები 9 დაკარგულ ადამიანს ეძებენ.
- ბაგების დასახლებაში დღეს მეწყერი ჩამოწვა. მდინარის კალაპოტი მთის ჩამოშლამ ჩაკეტა. იმატა წყლის დონემ. ადგილობრივი მოსახლეობა შიშობს, რომ არ განმეორდეს ორი დღის წინანდელი სცენარი, თუ წყალი გასავალს ვეღარ იპოვის. დაზიანებულია გზა და გზისპირა ნაგებობები.ბაგებში მივიდა ვაკე-საბურთალოს გამგებელი ლაშა აბაშიძე. მისი თქმით, კვლავ არსებობს მიწის მასის ჩამოწოლის საფრთხე. ადგილზე მუშაობენ სპეციალისტებიც.
- გაწმენდითი სამუშაოები გრძელდება გმირთა მოედანზე - თბილისის მერი და ვიცეპრემიერი იმედოვნებენ, რომ საავტომობილო გზა მალე აღდგენა. მაშველებთან და დასუფთავების სამსახურის თანამშრომლებთან ერთად ადგილზე მოხალისეებიც მუშაობენ. გმირთა მოედანზე იმყოფებოდნენ ევროკავშირის სადამკვირვებლო მისიის წარმოამდგენლებიც, რომლებიც ზარალის აღწერის მონიტორინგს ატარებენ.
- დღეს პარლამენტის ბიუროს სხდომაზე გადაწყდა, რომ პარლამენტი 13 ივნისის სტიქიით დაზარალებულებს ერთი მილიონი ლარით დაეხმარება. პარლამენტს ამ ფულით ძველი შენობის ფასადი უნდა გაერემონტებინა. უკვე დღეიდან მსურველებს დაზარალებულთათვის თანხის გადარიცხვა ფინანსთა სამინისტროს სახელმწიფო ხაზინის ანგარიშზე შეუძლიათ. დღესვე ამ ანგარიშზე საქართველოს შემოსავლების სამსახურის თანამშრომლებმა 100 ათასი ლარი შეიტანეს. სტიქიით დაზარალებულებისთვის 50 ათასი ლარი გადარიცხა საქართველოს საპარტნიორო ფონდმა. 100 ათას ლარს გამოყოფს საქართველოს ბანკი. თიბისი ბანკი დაზარალებულებს 50 ათასით დაეხმარება. ბანკი რესპუბლიკა კი - 30 ათასით. 10 ათასი ლარით დაეხმარება დაზარალებულ ოჯახებს რომპეტროლი. სამშენებლო კომპანია მეტრა სტიქიით დაზარალებულ ერთ ოჯახს ბინას გადასცემს. სტიქიით დაზარალებულებს სურსათითა და პირველადი მოხმარების ნივთებით მოსახლეობაც ეხმარება.