საქართველოს რეგიონული განვითარებისა და ინფრასტრუქტურის მინისტრი ნოდარ ჯავახიშვილი, სახელმწიფო სამშენებლო კომპანიისა და საავტომობილო გზების დეპარტამენტის წარმომადგენლებთან ერთად ახალდაბის გზის მიმდებარე ტერიტორიაზე მომხდარი სტიქიის სალიკვიდაციო სამუშაოებს გაეცნო.
საქართველოს რეგიონული განვითარებისა და ინფრასტრუქტურის სამინისტროს „სახელმწიფო სამშენებლო კომპანიამ“ ახალდაბის გზა მესამე მეწყრული კერისგან გაათავისუფლა. ამჟამად კომპანია გზაზე ჩამოწოლილი ყველაზე მოცულობითი მეწყრული კერის ლიკვიდაციაზე მუშაობს. ადგილზე მობილიზებულია კომპანიის სპეცტექნიკა და სამუშაოები უწყვეტ რეჟიმში ხორციელდება.
შ.პ.ს. „სახელმწიფო სამშენებლო კომპანიამ“ ახალდაბის გზის გაწმენდა გუშინ, დამეწყრილ ტერიტორიაზე სამუშაოების წარმოების შესაძლებლობისთანავე დაიწყო.
13-14 ივნისის ღამეს, წყნეთი-ბეთანიის დამაკავშირებელ მონაკვეთზე, დაახლოებით 500 000 კუბური მეტრის მოცულობის მეწყერაი ჩამოწვა. სტიქიამ გზასთან ერთად მასთან მისასვლელი ბილიკებიც ჩახერგა, რის გამოც, ვერ ხერხდება მეწყერთან შემოვლითი გზებით მიახლოვება და გაწმენდითი სამუშაოები მხოლოდ ერთი - ცენტრალური გზის მხრიდან მიმდინარეობს.