ერთიანი ნაციონალური მოძრაობის ლიდერი დავით ბაქრაძე, ხონის მუნიციპალიტეტის სოფელ კუხში, ძიძიგურების ოჯახში იმყოფებოდა, სადაც ოჯახის უფროსმა მას თავიანთი პრობლემების შესახებ უამბო. ძიძიგურების მრავალსულიან ოჯახს 3 შვილი ჰყავს, უფროსი 4 წლის გოგონა კი ცერებრალური დამბლითაა დაავადებული. გოგონას მამის, ჯაბა ძიძიგურის თქმით, 2012 წლის არჩევნებამდე, ის გააფრთხილეს, რომ თუ ნაციონალური მოძრაობის მხარდამჭერად დარჩებოდა, დახმარებას და ყოველგვარ შეღავათებს დაკარგავდა. მიუხედავად გოგონას მძიმე მდგომარეობისა, წინასაარჩევნო მუქარა შესრულდა და არჩევნების შემდეგ, ოჯახს სოციალური დახმარება მოუხსნეს. ახლა კი მათი ერთადერთი შემოსავალი, 4 წლის თეკლასთვის დანიშნული 100 ლარიანი პენსია და წელიწადში ერთხელ, ადგილობრივი თვითმმართველობის მიერ გაწეული 200 ლარიანი დახმარებაა. ძიძიგურის თქმით, ეს შემოსავალი ოჯახს მედიკამენტების შესაძენადაც არ ჰყოფნის, მით უმეტეს იმ ფონზე, როცა წამლებზე ფასებმა იმატა.