17 მაისს თბილისში, ჰომოფობია და ტრანსფობია სამ ადგილას გააპროტესტეს. ქალთა ინიციატივების მხარდამჭერმა ჯგუფმა 15 წუთიანი აქცია ვაჩნაძის ქუჩაზე გამართა. ასევე, ორგანიზაცია ლგბტ საქართველომ ჰომოფობია დაგმო იუსტიციის სამინისტროსთან. მრგვალ ბაღში კი, რამდენიმე არასამთავრობო ორგანიზაციამ შეკრებილებს 2012 წლის 17 მაისის საქმეზე ევროსასამართლოს გადაწყვეტილება გააცნო. აღსანიშნავია, რომ აქციების ჩატარების დრო და ადგილი წინასწარ საჯაროდ დაანონსებული არ ყოფილა. ორგანიზატორებმა მედიას და შეხვედრის მონაწილეებს რამდენიმე საათით ადრე შეატყობინეს, სად იგეგმებოდა შეკრება.

უსაფრთხოების მსგავსი ზომები ორგანიზაციებმა წარსული გამოცდილების გათვალისწინებით მიიღეს - 2012-13 წლებში აქტივისტებმა ვერ მოახერხეს მშვიდ და უსაფრთხო გარემოში გამოეხატათ საკუთარი აზრი.

აქტივისტთა ნაწილის აზრით, გუშინ მშვიდობიან გარემოში ჩატარებული აქციები წინ გადადგმული ნაბიჯი იყო, რადგან ხელისუფლებამ შეძლო და აქციის მონაწილეები დაიცვა აგრესიულად განწყობილი რელიგიური ექსტრემისტებისგან, მაგრამ ფაქტი ფაქტად რჩება - არასამთავრობო ორგანიზაციებმა ვერც წელს მოახერხეს გაემართად აქცია იქ, სადაც მათ სურდათ. რუსთაველის გამზირი ეკლესიისთვის კვლავ რჩება საკრალურ ადგილად, სახელმწიფო კი მზად არაა აქტივისტების უსაფრთხოება დაიცვას.

იყო თუ არა წლევანდელი 17 მაისი წინ გადადგმული ნაბიჯი ჰომოფობიასთან ბრძოლის გზაზე და რა წინაპირობები სდევდა აქციების ასე მალულად გამართვას. ამ თემებზე ორგანიზაცია იდენტობას წარმომადგენელ ირაკლი ვაჭარაძესთან ერთად ვსაუბრობთ.