მინისტრთა კაბინეტის წევრებმა დღეს დეპუტატებს საკუთარი პროგრამები და სამომავლო გეგმები წარუდგინეს. ნდობის გამოცხადებამდე ერთი დღით ადრე მინისტრებს შესაბამისი კომიტეტების გაერთიანებულ სხდომებზე მოუსმინეს. ერთიანი ნაციონალური მოძრაობის წევრებმა დღეს თითქმის ყველა სხდომა პროტესტის ნიშნად დატოვეს. როგორც სხდომებიდან გამოსვლის შემდეგ უმცირესობის წევრები ამბობდნენ, მათ მინისტრებისათვის კითხვის დასმის საშუალება არ მიეცათ. დღეს ძალოვანმა მინისტრებმა საკუთარი პროგრამები დეპუტატებს იურიდიულ საკითხთა, საპროცედურო, ადამიანის უფლებათა და თავდაცვის კომიტეტების გაერთიანებულ სხდომაზე წარუდგინეს. სპორტის, განათლების, კულტურისა და ჯანდაცვის კომიტეტების გაერთიანებულ სხდომაზე დაპირისპირება უმრავლესობის წევრს ზაზა პაპუაშვილსა და უმცირესობის წევრ სერგო რატიანს შორის მოხდა. სერგო რატიანი მინისტრებისათვის კითვის დასმას ცდილობდა , რა დროსაც პაპუაშვილმა მიკროფონი ადგილიდან მოხსნა და რატიანს წაართვა. ინციდენტის შემდეგ სერგო რატიანმა სხდომა დატოვა. რიგგარეშე სესია, რომელზეც პარლამენტმა მინისტრთა ახალ კაბინეტს ნდობა უნდა გამოუცხადოს, ხვალ პირველ საათზეა ჩანიშნული.