საქართველოს პრეზიდენტმა გიორგი მარგველაშვილმა ნდობის მისაღებად მთავრობის განახლებული შემადგენლობა პარლამენტს რამდენიმე საათის წინ წარუდგინა. პრემიერმინისტრმა ირაკლი ღარიბაშვილმა მთავრობის ახალი შემადგენლობა პრეზიდენტს 1 მაისს გადაუგზავნა, თუმცა, მაშინ გიორგი მარგველაშვილმა კონსტიტუციით მინიჭებული უფლებამოსილება გამოიყენა და ხელმოწერა გადადო. მისი მოსაზრებით, პოლიტიკურ ხელმძღვანელობას დაბალანსებული გადაწყვეტილება მშვიდ გარემოში უნდა მიეღო.
მთავრობის უკვე წარდგენილი შემადგენლობის შეცვლას, რომ არ აპირებდა, პრემიერმინისტრმა დღეს კიდევ ერთხელ აღნიშნა. ღარიბაშვილის თქმით, პარლამენტში არსებობს მზაობა, რომ კომიტეტებში პროგრამები და კანდიდატები განიხილონ.
მთავრობისათვის დაჩქარებული წესით ნდობის გამოცხადებისათვის მზადყოფნა დღეს კიდევ ერთხელ გამოხატა პარლამენტის თავმჯდომარე დავით უსუფაშვილმა. მისი თქმით, პრეზიდენტმა პაუზა მთავრობასთან და პარლამენტთან კომუნიკაციის მიზნით გამოიყენა, რაც უკვე შედგა.