- პარლამენტი მთავრობის ახალი შემადგენლობისთვის ნდობის გამოცხადებაზე კვირის ბოლოს იმსჯელებს, თუმცა სხდომის ზუსტი თარიღი ჯერ კიდევ უცნობია. ცნობილია ის, რომ მთავრობის დასახელებულ შემადგენლობაში ცვლილებები არ იქნება - ყოველ შემთხვევაში, ასე ამბობენ მმართველი გუნდის წარმომადგენლები. მინისტრთა განახლებული კაბინეტისთვის ნდობის გამოცხადებას არ აპირებს საპარლამენტო ოპოზიცია.
- სანამ პარლამენტი ნდობის საკითხის განიხილავს, მინისტრობის საკანდიდატები მომავალ თანამშრომლებს ხვდებიან. თინა ხიდაშელი, გიგლა აგულაშვილი და ტარიელ ხეჩიკაშვილი, შესაბამისად თავდაცვის, გარემოს დაცვის და სპორტის სამინისტროებში იმყოფებოდნენ. შეხვედრებს უწყებების ყოფილი ხელმძღვანელებიც ესწრებოდნენ.
- ეკონომიკური გუნდის პარლამენტში მისვლა გადაიდო. საკომიტეტო მოსმენაზე ფინანსთა და ეკონომიკის მინისტრების, ასევე ეროვნული ბანკის პრეზიდენტის დასწრებას თავად საპარლამენტო უმრავლესობა ითხოვდა მანამ, სანამ სამთავრობო ცვლილებები მოხდებოდა. დღეს მმართველ გუნდში ამბობენ, რომ მათ კითხვებს პარლამენტში სამთავრობო პროგრამის წარდგენის დროს დაუსვამენ, რაც უახლოეს მომავალში მოხდება.
- აპრილის თვეში საქართველოში ტურისტთა რაოდენობის ზრდის ტემპი 20-ჯერ შემცირდა - შინაგან საქმეთა სამინისტროს საზღვრის კვეთის სტატისტიკის მიხედვით, აპრილში ქვეყანაში სულ 394 ათასი უცხოელი ვიზიტორი შემოვიდა და ტურისტული ნაკადის ზრდის ტემპმა 0.4 % პროცენტი შეადგინა, რაც წინა წლის აპრილის ტემპთან შედარებით ოცჯერ ნაკლებია.