- მინისტრთა კაბინეტში ცვლილებაა - ინფრასტრუქტურისა და რეგიონული განვითარების მინისტრი პოსტს საკუთარი განცხადების საფუძველზე ტოვებს. მიზეზად ჯანმრთელობის მდგომარეობა სახელდება. მმართველი გუნდის წევრები შავლიაშვილის მინისტრობის პერიოდს დადებითად აფასებენ და ხელისუფლებაში დაპირისპირების არსებობას უარყოფენ. საპირისპირო მოსაზრება აქვს ოპოზიციას.
- უკვე ცნობილია, რომ დავით შავლიაშვილს ინფრასტრუქტურის მინისტრის პოსტზე მისი მოადგილე ნოდარ ჯავახიშვილი შეცვლის, რომელიც წარსულში ქართუ ბანკის დირექტორი იყო. მის სახელს რამდენიმე ხმაურიანი განცხადება უკავშირდება, მათ შორის, საერთაშორისო სავალუტო ფონდის მისიის ხელმძღვანელის კორუმპირებულობის შესახებ. თავის დროზე ამ განცხადებას კაბინეტის ზოგიერთი წევრი გაემიჯნა, თუმცა, ახლა მათ მუშაობა ერთად მოუწევთ. ნოდარ ჯავახიშვილის მინისტრად დანიშვნას მიესალმება ბიძინა ივანიშვილი, თუმცა ამბობს, რომ ამ გზით მისი გავლენა მთავრობაზე არ იზრდება.
- პრეზიდენტის სამუშაო ადგილთან დაკავშირებით კვლავ დავობენ - გიორგი მარგველაშვილის ადმინისტრაცია ავლაბრის სასახლის დატოვებას არ აპირებს, მოქმედი და ყოფილი პრემიერები კი მას ათონელზე გადასვლას ურჩევენ. ათონელის რეზიდენციის რემონტი, რაზეც 26 მილიონ ლარზე მეტი დაიხარჯა, ცოტა ხნის წინ დასრულდა. თუ ადმინისტრაცია პოზიციას არ შეიცვლის, მთავრობას შენობისთვის ახალი ფუნქციის მოძებნა მოუწევს.
- გურჯაანის გამგეობაში მაჟორიტარი დეპუტატის გიორგი ღვინიაშვილის კაბინეტის კარი აჭედეს. გამგებელი ამბობს, რომ არ იცის, ეს ვინ გააკეთა