- ვანო მერაბიშვილმა და გიგი უგულავამ 7 ნოემბრისა და ტელეიმედის საქმეზე გამართული წინასასამართლო სხდომა. დატოვეს. ამას წინ უძღოდა ყოფილი მაღალჩინოსნების პოლიტიკური განცხადებები. გიგი უგულავამ განაცხადა, რომ სასამართლო პროცესების სამართლებრივ ნაწილში მონაწილეობას აღარ მიიღებს და სასამართლოზე მხოლოდ ახლობლების სანახავად და განცხადების გასაკეთებლად მოვა. თბილისის ყოფილი მერის პროტესტი წინასწარი პატიმრობის ვადის გასვლის შემდგომ მისი პატიმრობაში დატოვებამ გამოიწვია.
- კახაბერ ნაკანის მიერ თვითმკვლელობის მცდელობა ნაციონალური მოძრაობის პროტესტის მიზეზი გახდა. ზურაბ ჯაფარიძემ დღეს სხდომაზე თქვა, რომ კახა ნაკანი უკანონოდ არის დაკავებული და მისი პატიმრობა ივანიშვილის პირად ინტერესებს ემსახურება. ოპოზიცურმა პარტიამ პარლამენტში რეგისტრაცია არ გაიარა, რის გამოც კვორუმი ვერ შედგა. საქართველოს პარლამენტის თავმჯდომარემ ნაციონალური მოძრაობა ამომრჩევლების მიმართ უპასუხისმგებლობაში დაადანაშაულა და პლენარული სხდომა ჩაშლილად გამოაცხადა.
- საქალაქო სასამართლოში ადვოკატ გოგა ონიანის საქმის განხილვა გადაიდო. ადვოკატებმა დღევანდელ პროცესზე აუდიო მასალები, არასამთავრობო ორგანიზაციების განცხადებები და სახალხო დამცველის ანგარიში წარადგინეს, რომლებშიც საუბარი პოლიტიკური მოტივით დევნაზე იყო. პროკურატურამ მასალების გასაცნობად დრო ითხოვა, რის გამოც განხილვა 5 მაისამდე გადაიდო. პროცესს ესწრებოდა საქართველოს ადვოკატთა ასოციაციის თავმჯდომარე ზაზა ხატიაშვილიც. მისი თქმით, გოგა ონიანი პოლიტიკური დევნილია.