ვანო მერაბიშვილმა და გიგი უგულავამ 7 ნოემბრისა და ტელეიმედის საქმეზე დღეს გამართული წინასასამართლო სხდომა დატოვეს. მათთან ერთად სხდომიდან წავიდნენ მათი ახლობლები და მეგობრები. ამას წინ უძღოდა ყოფილი მაღალჩინოსნების პოლიტიკური განცხადებები. გიგი უგულავამ განაცხადა, რომ სასამართლო პროცესების სამართლებრივ ნაწილში მონაწილეობას აღარ მიიღებს და სასამართლოზე მხოლოდ ახლობლების სანახავად და განცხადების გასაკეთებლად მოვა. თბილისის ყოფილი მერის პროტესტი წინასწარი პატიმრობის ვადის გასვლის შემდგომ მისი პატიმრობაში დატოვებამ გამოიწვია.
პროცესზე ვანო მერაბიშვილი სპეცდანიშნულების რაზმის ყოფილი ხელმძღვანელის კახაბერ ნაკანის თვითმკვლელობის მცდელობის ფაქტს გამოეხმაურა. მან მოუწოდა ნაკანს, რომ "მტკიცედ იდგეს და პატარა ადამიანებს ნუ გაახარებს." ექსპრემიერის განცხადებით, ნაციონალური მოძრაობის ხელისუფლებაში დაბრუნების შემდეგ ამნისტია შეეხება იმ ადამიანებს, ვინც პოლიტიკურ ოპონენტებს დევნიდა. თუმცა, მისი თქმით, ვინც ფიზიკურ პირებს, მათ შორის კახაბერ ნაკანს, დევნიდა, პასუხს აგებინებს.
დღევანდელ სხდომაზე სასამართლომ არ განიხილა ადვოკატების შუმადგომლობა, რომლებიც ითხოვდნენ აღკვეთის ღონისძიების შეცვლას და გიგი უგულავას გათავისუფლებას. ბრალდების მხარემ დააყენა სხდომის გადადების შუამდგომლობა,რადგან ამ საქმის პროკურორები სხვა პროცესზე იმყოფებოდნენ.