■ ექსპრეზიდენტ მიხეილ სააკაშვილის სახელობის საპრეზიდენტო ბიბლიოთეკასთან ახალგაზრდულმა ორგანიზაცია „თავისუფალმა თაობამ“ საპროტესტო აქცია გამართა.
აქციის მონაწილეების თქმით, ბიბლიოთეკის შენობაში „ნაციონალური მოძრაობის“ წევრები იმყოფებოდნენ, რომლებიც უკრაინის თემისადმი მიძღვნილ გამოფენას მართავდნენ.
როგორც ორგანიზაციის ხელმძღვანელმა ლადო სადღობელაშვილმა განაცხადა, „ნაციონალური მოძრაობა“ საქართველოს უკრაინასთან ურთიერთობაში ხელს უშლის.
აქციის მონაწილეებმა საპრეზიდენტო ბიბლიოთეკასთან წითელსაღებავიანი კვერცხები მიიტანეს და ბიბლიოთეკის შენობას ესროლეს.
ინციდენტის შემდეგ, ადგილზე მობილიზებულმა საპატრულო პოლიციამ აქციის ხუთი მონაწილე, მათ შორის ორგანიზაციის ხელმძღვანელი ლადო სადღობელაშვილი დააკავა.
აქციის მონაწილეებმა ბიბლიოთეკასთან სიმღერა „მელა მატყუარაო“ ჩართეს.