■ გარდაცვლილი პრემიერის ზურაბ ჟვანიას ძმამ გოგლა ჟვანიამ ტელეკომპანია „ტაბულას“ გადაცემა „თეორემაში“ თამარ ჩერგოლეიშვილის შეკითხვებს უპასუხა და კიდევ ერთხელ აღნიშნა, რომ ჟვანიას პირადი ცხოვრების შესახებ ხმები ხელისუფლებამ განზრახ გაავრცელა.
„თქვენ რაღაც ძალიან გაწუხებთ ზურას პირადი ცხოვრება, სულ ამაზე საუბრობთ. ზურას პირად ცხოვრებაში არ არის საიდუმლოებები“ - განუცხადა გოგლა ჟვანიამ თამარ ჩერგოლეიშვილს.
მანვე აღნიშნა, რომ წინა ხელისუფლებამ შექმნა მითები ზურაბ ჟვანიას პირადი ცხოვრების შესახებ, რათა ოჯახის წევრებს ამ საქმეში ქექვა არ დაეწყოთ და ამასთანავე, საზოგადოების აზრის ფორმირება მომხდარიყო.
თამარ ჩერგოლეიშვილის კითხვაზე, მიაჩნია თუ არა მას ჰომოსექსუალური აქტი სიბინძურედ, გოგლა ჟვანიამ აღნიშნა, რომ ის ასე ფიქრობს. გადაცემის ავტორი ასევე დაინტერესდა, თუკი ის დაუშვებდა, რომ ჰყავდა ჰომოსექსუალი ძმა, ჩათვლიდა თუ არა მას ბინძურად.
„კი. ეს იქნებოდა ჩვენი ოჯახის უბედურება, მაგრამ ამასთან ადგილი არ გვაქვს" - განაცხადა გოგლა ჟვანიამ.