დღეს, საქართველოს სტომატოლოგთა ასოციაციის მიერ, ჯანდაცვის სამინისტროს მხარდაჭერით სასტუმრო "ძველ თბილისში" გაიმართა კონფერენცია "სტომატოლოგია C ჰეპატიტის ელიმინაციის პროგრამაში".
ღონისძიებას ესწრებოდნენ ჯანდაცვის მინისტრის მოადგილე ზაზა სოფრომაძე, დაავადებათა კონტროლის ეროვნული ცენტრის დირექტორი ამირან გამყრელიძე, სხვადასხვა ასოციაციები, ასოციაციის წევრი და არაწევრი ექიმები.
ღონისძიებაზე განხილულ იქნა ჯანდაცვის სამინისტროს ახალი პროექტის "C ჰეპატიტის ელიმინაციის პროგრამის" წარმატებით განხორციელებისათვის საჭირო ნაბიჯები. კონფერენციაზე C ჰეპატიტი განიხილეს მრავალი მიმართულებით: მისი გავრცელება, ეპიდემიოლოგია, გადაცემის გზები, მკურნალობა, პრევენცია. ასევე დაავადებულთა უფლებები და დისკრიმინაციის საკითხები.
როგორც ცნობილია, პროგრამის ფარგლებში ჯანდაცვის სამინისტრო იწყებს სტომატოლოგიური კაბინეტებისა და C ჰეპატიტის გავრცელების მაღალი რისკის შემცველი ობიექტების ჰიგიენური ნორმების კონტროლის გამკაცრებას და მუდმივ მონიტორინგს.
სტომატოლოგები აცხადებენ მზადყოფნას, აღასრულონ სამინისტროს მითითებები აღნიშნული მიმართულებით.