საქართველოს განათლებისა და მეცნიერების სამინისტროს განათლების ხარისხის განვითარების ეროვნულ ცენტრსა და საქართველოს დამსაქმებელთა ასოციაციას შორის ურთიერთთანამშრომლობის მემორანდუმი გაფორმდა. მემორანდუმს ხელი ცენტრის დირექტორმა, ელენე ჯიბლაძემ და ასოციაციის პრეზიდენტმა, ელგუჯა მელაძემ მოაწერეს.
მემორანდუმის გაფორმება მიზნად ისახავს შრომის ბაზრის საჭიროებებისა და ტენდენციების იდენტიფიცირებაში, პროფესიული სტანდარტებისა და პროფესიული საგანმანათლებლო პროგრამების შემუშავებაში თანამშრომლობას. მემორანდუმი ასევე ითვალისწინებს პროფესიული სწავლების, განსაკუთრებით კი, პრაქტიკული სწავლების ხელშეწყობას.
შეთანხმების ფარგლებში მხარეები პროფესიულ სტუდენტთა სწავლის შედეგების ობიექტურ და ადეკვატურ შეფასებას განახორციელებენ და ასევე ითანამშრომლებენ პროფესიულ კვალიფიკაციათა განვითარებისათვის.