პარლამენტის ადამიანის უფლებების დაცვის კომიტეტის სხდომაზე უმცირესობისა და უმრავლესობის წარმომადგენლები ერთმანეთს ფიზიკურად დაუპირისპირდნენ.
როგორც „ინფო 9“-ს საპარლამენტო კორესპონდენტი იუწყება, სხდომაზე კამათი ე.წ. გასაღების საკითზე „ნაციონალ“ ჩიორა თაქთაქიშვილსა და უმრავლესობის წევრ მერაბ კაჭახიძეს შორის დაიწყო. მერაბ კაჭახიძემ თაქთაქიშვილს ავადმყოფი უწოდა. დეპუტატების კამათში აკაკი მინაშვილი და ნუგზარ წიკლაური ჩაერთნენ და კაჭახიძის მიმართ ფიზიკურად გაიწიეს.
ჩხუბის მონაწილე დეპუტატები საკომიტეტო დარბაზიდან მანდატურებმა გაიყვანეს. დერეფანში თანაგუნდელების მხარდასაჭერად, ადგილზე „ნაციონალური მოძრაობის“ სხვა დეპუტატები გივი თარგამაძე, გოკა გაბაშილი, ლევან ბეჟაშვილი, გიორგი თევდორაძე და დავით საყვარელიძეც მივიდნენ, სადაც კამათი მათ შორის გაგრძელდა. ამ დორისთვის ინციდენტი ამოწურულია.