■ საქართველოს სამოციქულო მართლმადიდებელი ეკლესია გიორგობის დღესასწაულს აღნიშნავს. სამების საკათედრო ტაძარში საზეიმო წირვა-ლოცვა უწმინდესმა და უნეტარესმა, სრულიად საქართველოს კათოლიკოს პატრიარქმა ილია მეორემ აღავლინა.
საზეიმო წირვას საქართველოს პრეზიდენტი გიორგი მარგველაშვილი და პრემიერ-მინისტრი ირაკლი ღარიბაშვილი მეუღლეებთან ერთად ესწრებოდნენ. წირვას თბილისის მერი დავით ნარმანია შვილთან ერთად დაესწრო.
პრეზიდენტმა საქართელოს მოსახლეობას და განსაკუთრებით კი, ოკუპირებულ ტერიტორიებზე მცხოვრებ საქართველოს მოქალაქეებს დღევანდელი დღე მიულოცა.
პატრიარქმა დღესვე, სამების საკათედრო ტაძარში შეკრებილი სახელმწიფო დაცვის სპეციალური სამსახურის თანამშრომლები დალოცა.
„დღეს ხსენებაა წმინდისა გიორგისა. წმინდა გიორგი ჩვენს წინაშე არის როგორც სიმბოლო ჩვენი ერისა, როგორც უძლეველი ძალა, რომელიც იცავს საქართველოს, ჩვენს ეკლესიას. ჩვენს წინაშე ორი პიროვნებაა - იმპერატორი დიოკლეტიანე, რომელიც აწამებს და წმინდა გიორგი, რომელიც არის წამებული. ერთი არის დამარცხებული, მეორე - გამარჯვებული. გამარჯვებული წმინდა გიორგია მიუხედავად იმისა, რომ მწამებელი იყო დიოკლეტიანე. ღმერთმა ყველას ძალა მოგცეთ, მშვიდობა, სიხარული და სიყვარული“- ბრძანა პატრიარქმა.
აღსანიშნავია, რომ დღეს სამების ტაძრის კურთხევიდან ათი წელი შესრულდა. სამების ტაძარი 2004 წლის 23 ნოემბერს, გიორგობის დღეს, უწმინდესმა და უნეტარესმა სრულიად საქართველოს კათოლიკოს-პატრიარქმა ილია მეორემ აკურთხა. პატრიარქი ქადაგებისას ამ თარიღსაც შეეხო.
„დღეს განსაკუთრებული დღეა, წმინდა გიორგის ხსენება და სამების ტაძრის გახსნის და მოქმედების ათი წლისთავია. განსაკუთრებით მინდა დავლოცო ბატონი ბიძინა ივანიშვილი, რომელმაც უდიდესი წვლილი გაიღო ამ ტაძრის მშენებლობაში. ღმერთმა შეუწიროს, ღმერთმა ძალა მისცეს, მომავალი ღვაწლისათვის. ბჭენი ჯოჯოხეთისანი ვერ ერეოდნენ ეკლესიას და ვერ მოერევიან იმას, რომელიც აშენებს ეკლესიას“ - ბრძანა პატრიარქმა.
საქართველოს სამოციქულო მართლმადიდებელი ეკლესია წმინდა გიორგის ხსენების დღეს წელიწადში ორჯერ - 6 მაისსა და 23 ნოემბერს აღნიშნავს.
ავტორი: ლიკა მეგუთნიშვილი
ოპერატორი: დავით საჯაია