სასმელი წყალი გრაფიკით. პრობლემა, რომელიც ქუთაისს ათწლეულებია აწუხებს. მოსახლეობა წყლის მარაგის შეგროვებას უკვე მიეჩვია. მაგალითად, ვაჟა–ფშაველას ქუჩის მცხოვრებლებს ყოველ დილას 7 საათზე ადგომა სწორედ წყლის მოსამარაგებლად უწევთ. თუმცა, რეგიონული განვითარებისა და ინფრასტრუქტურის მინისტრი პირობას დებს, რომ პრობლემა უახლოესი ორი წლის განმავლობაში ეტაპობრივად აღმოიფხვრება. ქალაქში უკვე მიმდინარეობს ინფრასტრუქტურული სამუშაოები. სამუშაოებს აზიის განვითარების ბანკი 26 მილიონი ლარით აფინანსებს.