19 აგვისტო აღმოსავლეთ საქართველოსთვის, სავარაუდოდ, ყველაზე ცხელი დღე იქნება. ხვალ თბილისსა და კახეთის რეგიონში 41 გრადუსია მოსალოდნელი. ეს მაჩვენებელი დღეს უკვე დაფიქსირდა იმერეთსა და სამეგრელოში. მაღალი ტემპერატურის გამო, ექიმები მოსახლეობას რამდენიმე რეკომენდაციას აძლევენ. რისკჯგუფებში ქრონიკული დაავადებების მქონე პირები, ორსულები და ბავშვები შედიან. თბილისის ზღვასა და ტბებზე ხალხის ნაკადის ზრდის ფონზე, მუშაობის საგანგებო რეჟიმზე გადადის საგანგებო სიტუაციების სამსახურიც. თუმცა, სპეციალისტების რჩევების გათვალისწინება მოქალაქეებს, სავარაუდოდ, მომდევნო დღეებშიც მოუწევთ. როგორც სინოპტიკოსების პროგნოზიდან ირკვევა, დასავლეთ საქართველოსგან განსხვავებით, ქვეყნის აღმოსავლეთ ნაწილში მაღალი ტემპერატურა კვირის ბოლომდე შენარჩუნდება. გიორგი ფუტკარაძის პირდაპირი რეპორტაჟი. მოსალოდნელი მაღალი ტემპერატურის გამო, დღის საათებში მუშაობის დროებით შეჩერებას ითხოვენ რკინიგზელები. მოთხოვნა 19-დან 22 აგისტომდე პერიოდს ეხება, თუმცა რკინგზელთა ახალი პროფკავშირების მიმართვას მენეჯმენტი ამ დრომდე არ გამოხმაურებია. დაანონსებული ცხელი დღეების წინ ახალი ინიციატივით გამოდის პროფკავშირების გაერთიანებაც. მშრომელთა უფლებების დამცველები დამსაქმებლებს იმ დადგენილების შესრულებისკენ მოუწოდებენ, რომელიც სამუშაო პირობებს არეგულირებს.