დღეს საქართველოს რეგიონული განვითარებისა და ინფრასტრუქტურის მინისტრის პირველმა მოადგილემ, თენგიზ შერგელაშვილმა საზოგადოებას საგაზაფხულო გაწვევის შედეგები გააცნო.
2014 წლის საგაზაფხულო გაწვევის პერიოდში სავალდებულო სამხედრო სამსახურში გაწვეულ იქნა 2582 წვევამდელი, რითაც მთლიანად დაკმაყოფილდა საქართველოს სასჯელაღსრულებისა და პრობაციის (782), თავდაცვის (600) და შინაგან საქმეთა სამინისტროების (1200) მოთხოვნები.

სამხედრო სავალდებულო სამსახურში საგაზაფხულო გაწვევას კოორდინირებას საქართველოს რეგიონული განვითარებისა და ინფრასტრუქტურის სამინისტრო უწევდა. წინასაარჩევნო პერიოდის მიუხედავად, წვევამდელთა წინსწრებით ჩარიცხვებისა და გაწვევის პროცესი წარმატებით განხორციელდა, რასაც საკოორდინაციო ჯგუფის ორგანიზებულმა მუშაობამ შეუწყო ხელი.

ამ დროისათვის, სამხედრო სავალდებულო სამსახურში საგაზაფხულო გაწვევა უკვე დასრულებულია. საშემოდგომო გაწვევისთვის მზადება კი ივლისის ბოლოს დაიწყება. წვევამდელების გაწვევა განხორციელდება იმ ტერიტორიულ ერთეულებშიც, რომელიც ახალი თვითმმართველობის კოდექსის ამოქმედების შემდეგ შეიქმნა.

სამხედრო სავალდებულო სამსახურში საშემოდგომო გაწვევა მიმდინარე წლის აგვისტოში დაიწყება.