თელავის ნაგავსაყრელი ერთ-ერთია იმ ინფრასტრუქტურული პროექტებიდან, რომელიც კახეთში ხორციელდება. 2013 წელს მხარეში მოეწყო და რეაბილიტაცია ჩაუტარდა 31.349 კმ გზას, 2 ხიდს; 2 სოფელსა და 3 ქალაქში მოწესრიგდა წყალმომარაგებისა და მიწისქვეშა კომუნიკაციები; კეთილმოეწყო 2 სოფლის ტერიტორიული ორგანოს შენობა.
2013 წელს მდინარე ალაზანზე, კაკლისყურეში, საქართველოს საავტომობილო გზების დეპარტამენტმა განახორციელა მასშტაბური ნაპირსამაგრი სამუშაოები, რომელმაც საქართველოს 200 ჰექტრამდე მიწა შეუნარჩუნა. უკვე მრავალი წელია, ამ მონაკვეთზე მდინარის ადიდების დროს, საქართველო ტერიტორიებს კარგავს. ალაზნის სანაპირო ზოლის გაუმაგრებლობის შემთხვევაში, საფრთხე ემუქრებოდა საქართველოს ტერიტორიის 200 ჰექტარზე მეტ მიწას, რომელიც, წყლის მოვარდნისას, საქართველოს ტერიტორიას მოწყდებოდა. კაკლისყურეში დასრულებული სამუშაოების შემდეგ, წელს, ალაზნის ნაპირგამაგრება გაგრძელდა მდინარის სამხრეთ-აღმოსავლეთ ნაწილში, სადაც 150 მეტრი სიგრძის ქვაყრილი მოეწყობა.
2013 წელს, რეგიონებში განსახორიციელებელი პროექტების ფონდიდან, კახეთის 97 სოფელსა და 24 ქალაქში დაფინანსდა 29 037 251 ლარის ღირებულების 121 ინფრასტრუქტურული პროექტი; 2014 წელს მხარის 53 სოფელსა და 31 ქალაქში უკვე დაფინანსებულია 17 725 542 ლარის ღირებულების 84 პროექტი.