საქართველოს რეგიონული განვითარებისა და ინფრასტრუქტურის მინისტრმა, დავით ნარმანიამ დღეს თანამდებობა ოფიციალურად დატოვა.
სამინისტროს თანამშრომლებთან გამართულ გამოსამშვიდობებელ შეხვედრაზე დავით ნარმანიამ უწყების მიერ მისი მინისტრობის დროს გაწეული მუშაობა შეაჯამა, ისაუბრა სამინისტროს მიღწევებზე, სხვადასხვა მიმართულებით უკვე განხორციელებულ და მიმდინარე ინფრასტრუქტურულ პროექტებზე და იმედი გამოთქვა, რომ დაწყებული სამუშაოები, გასული წლის მსგავსად, მომავალშიც წარმატებით განხორციელდება.
დავით ნარმანიამ მადლობა გადაუხადა სამინისტროს თანამშრომლებს აქტიური თანამშრომლობისა და კვალიფიციური საქმიანობისთვის. თავის მხრივ, სამინისტროს თანამშრომლებმა ყოფილ მინისტრს წარმატებები უსურვეს და მინისტრის რანგში მისი მუშაობა შეაფასეს, როგორც გამორჩეულად ნაყოფიერი.
დავით ნარმანიას მინისტრობის პერიოდში სრულად შეიცვალა მიდგომები პროექტების დაგეგმვისა და მათი განხორციელების კუთხით: გამჭვირვალე და კონკურენტუნარიანი გახდა ტენდერები, მნიშვნელოვნად გაიზარდა ტენდერებში მონაწილეობით დაინტერესებულ კომპანიათა რაოდენობა, შემუშავდა ხარისხის სტანდარტები და გაიზარდა მისი კონტროლის მექანიზმები, შეიქმნა პრიორიტეტის დადგენისა და პროექტების შერჩევის მეთოდოლოგია, შეიქმნა ელექტრონული გეო-ინფორმაციული სისტემა, სამინისტროს საქმიანობა გახდა ღია და გამჭვირვალე, ინფორმაცია კი ხელმისაწვდომი.
დღესვე დავით ნარმანიამ სამუშაო კაბინეტიდან საკუთარი ნივთები წაიღო. მათგან სამი წიგნი მან თბილისის უბნებში „სახეტიალოდ გასაშვებად" შეარჩია.