ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი ავსტრიაში სამუშაო ვიზიტის ფარგლებში ვენის დიპლომატიურ აკადემიას ეწვია. სახელმწიფო მინისტრმა შეხვედრა გამართა აკადემიის დირექტორთან, ყოფილ სახელმწიფო მდივანთან ელჩ ჰანს ვინკლერთან და მონაწილეობა მიიღო აკადემიაში გამართულ დისკუსიაში „საუბრები საქართველოზე-2014-ში ისევ გზაჯვარედინზე". შეხვედრას ვენაში აკრედიტებული დიპლომატიური კორპუსის, საერთაშორისო არასამთავრობო ორგანიზაციების, მედიისა და აკადემიური წრეების ასზე მეტი წარმომადგენელი დაესწრო. სახელმწიფო მინისტრმა სიტყვით გამოსვლისას განსაკუთრებული ყურადღება გაამახვილა უკრაინაში მიმდინარე მოვლენებზე, აღმოსავლეთ პარტნიორობის მონაწილე ქვეყნების წინაშე არსებულ გამოწვევებსა და საქართველოს საგარეო-პოლიტიკური პრიორიტეტების ურყევობაზე. ალექსი პეტრიაშვილმა, ამ კუთხით, ხაზი გაუსვა ევროკავშირსა და საქართველოს შორის ასოცირებისა და მისივე შემადგენელი ევროკავშირთან თავისუფალი სავაჭრო სივრცის შესახებ შეთანხმებების ხელმოწერის დაჩქარების მნიშვნელობას. სიტყვით გამოსვლის შემდეგ სახელმწიფო მინისტრმა შეხვედრის მონაწილეების შეკითხვებს უპასუხა.