2013 წლის 6 დეკემბერს, იტალიაში სამუშაო ვიზიტის ფარგლებში ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა რომის საერთაშორისო ურთიერთობების ინსტიტუტში შეხვედრა გამართა. ღონისძიებას „საქართველოს რეგიონული პოლიტიკა და ურთიერთობა ევროკავშირთან ვილნიუსის სამიტის შემდეგ" არასამთავრობო ორგანიზაციების, რომში აკრედიტებული დიპლომატიური კორპუსისა და მედიის წარმომადგენლები ესწრებოდნენ. შეხვედრაზე სიტყვით გამოსვლისას სახელმწიფო მინისტრმა ყურადღება გაამახვილა ევროკავშირთან ასოცირებისა და მისივე შემადგენელი თავისუფალი სავაჭრო სივრცის შესახებ შეთანხმებების პარაფირებისა და უახლოეს მომავალში შეთანხმებების ხელმოწერის მნიშვნელობაზე, ასევე, რუსეთის ფედერაციის მხრიდან გაძლიერებულ ზეწოლასა და საოკუპაციო ხაზების გავლების ფაქტებზე. საუბარი შეეხო საქართველოში დემოკრატიული რეფორმების განხორციელებას და ხაზი გაესვა ამ პროცესის შეუქცევადობას. შეხვედრაზე, ასევე, განსაკუთრებულად აღინიშნა საქართველოს მიერ შეტანილი წვლილი ავღანეთის საერთაშორისო უსაფრთხოების ოპერაციაში. სიტყვით გამოსვლის შემდეგ ალექსი პეტრიაშვილმა შეხვედრის მონაწილეების შეკითხვებს უპასუხა.