აჭარაში 4-ბალიანი შტორმი დაფიქსირდა. რეგიონში ძლიერი ქარი და წვიმაა. სანაპირო ზოლზე ამინდი დილის ხუთი საათისთვის გაუარესდა. მთელი ღამის განმავლობაში სანაპიროზე მაშველები პატრულირებდნენ. მათი ინფორმაციით, სტიქიას ამ დროისთვის სერიოზული ზიანი არ გამოუწვევია, თუმცა, აცხადებენ, რომ შტორმის გაძლიერებას ელოდებიან. უსაფრთხოების მიზნით, ღია ზღვაში მყოფი გემები ბათუმის იახტკლუბშია შემოყვანილი.
უამინდობამ პრობლემები შექმნა რეგიონის მაღალმთიან რაიონებში. ძლიერი წვიმის შედეგად მეწყერი ჩამოწვა ქედაში, სოფელ ზვარეში. მიწის მასამ ქვეშ მიკროავტობუსი მოიყოლა. შემთხვევას მსხვერპლი არ მოჰყოლია.
მეწყრის შედეგად ბათუმი- ახალციხის ცენტრალურ მაგისტრალზე რამდენიმე საათით საავტომობილო მიმოსვლა შეწყდა. ამ დროისთვის მოძრაობა აღდგენილია. დილიდან გადაუღებლად თოვს ხულოსა და შუახევში.
წყარო: აჭარის ტელევიზია