დავით ნარმანია თეთნულდის მთიდან ეხმაურება პრეზიდენტის ადმინისტრაციის იმ განცხადებას, რომლის თანახმადაც ამ სამთო-სათხილამურო კურორტზე სამშენებლო სამუშაოები შეჩერებულია. ამ დროისათვის იქ საპროექტო სამუშაოები მიმდინარეობს, უშუალოდ მშენებლობის დაწყებას კი 2014 წლის გაზაფხულიდან ვარაუდობენ. სამუშაო პროცესის საჩვენებლად, რეგიონული განვითარებისა და ინფრასტრუქტურის სამინისტრომ მედია ტური მოაწყო და ჟურნალისტებს პროექტის დეტალებზე ინფორმაცია ადგილზე მიაწოდა.
ტვირთის შეუფერხებლად გადაადგილების მიზნით, გაფართოვდა ორი საავტომობილო გვირაბი და მომზადდა ზვავებისა და მეწყერსაშიში ზონების მართვისა და წყალმომარაგების განვითარების გეგმა.
რეგიონული განვითარებისა და ინფრასტრუქტურის სამინისტროს ინფორმაციით, მოსამზადებელი სამუშაოები მიმდინარე წლის დეკემბერში დასრულდება, რის შემდეგაც, უწყება სამშენებლო კომპანიას ტენდერის საშუალებით გამოავლენს. საბაგიროების მშენებლობის პარალელურად, თეთნულდზე სათხილამურო ტრასების მშენებლობაც დაიწყება. ადგილობრივების თქმით, მესტია სამთო-სათხილამურო სპორტის მოყვარულთათვის, წლის ნებისმიერ დროს სასურველი ადგილი იქნება.