რუსთავში 112-ის ცენტრი გაიხსნა. საერთაშორისო სტანდარტების შესაბამისად აგებულ და თანამედროვე ტექნიკით აღჭურვილ 112-ის ახალ ცენტრში განსაკუთრებული საჭიროების მქონე პირებისთვის ადაპტირებული სამუშაო გარემოა შექმნილი. შენობაში მოწყობილია ანტისტრესული ოთახებიც, რომელიც იქ მომუშავე პერსონალს რთული სამუშაო პროცესის შემსუბუქების საშუალებას მისცემს. 112-ის ახალი ოფისი შინაგან საქმეთა მინისტრმა გიორგი მღებრიშვილმა პრემიერმინისტრსა და მთავრობის სხვა წევრებთან ერთად გახსნა. როგორც გიორგი მღებრიშვილმა აღნიშნა, 112-ის რუსთავის ცენტრის მიზანი, თბილისის 112-ის განტვირთვა და დაზღვევაა.
საპრეზიდენტო არჩევნებამდე 15 დღით ადრე დონალდ ტრამპსა და ჰილარი კლინტონის რეიტეინგებს შორის სხვაობა როგორც არასდროს დიდია დემოკრატი კანდიდატის სასარგებლოდ. ეი-ბი-სი ნიუსის მიერ ჩატარებული კვლევა აჩვენებს, რომ ჰილარი კლინტონი დონალდ ტრამპს 12 პროცენტით უსწრებს. ამერიკელი მილიარდერი გამოკითხვებს არ ენდობა, მის შტაბში კი ყოფილი სახელმწიფო მდივნის უპირატეოსობას აღიარებენ. ქეთი ცოხელი დეტალებით
ქუთაისის ნაციონალური მოძრაობის მაჟორიტარობის კანდიდატები აკაკი ბობოხიძე და გიგი წერეთელი ქუთაისის პარტიის ოფისში ეუთოს წარმომადგენლებს შეხვდნენ და მათ 8 ოქტომბერს არჩევნების დღეს მომხდარ დარღვევებზე ინფორმაცია მიაწოდეს. ნაციონალური მოძრაობის წარმომადგენლების თქმით, მნიშვნელოვანია საერთაშორისო დამკვირვებლებს დეტალურად ჰქონდეთ ინფორმაცია მომხდარ დარღვევებზე, ყურადღება გაამახვილონ მასზე და შესაბამისი რეაგირებაც მოახდინონ.
“ქართული ოცნების” ხაშურის მაჟორიტარი დეპუტატობის კანდიდატი ვალერი გელაშვილი და ლტოლვილთა და განსახლების მინისტრი სოზარ სუბარი ხაშურში მცხოვრებ იძულებით გადაადგილებულ პირებს შეხვდნენ. მინისტრმა და მაჟორიტარობის კანდიდატმა დევნილებს ის პროგრამები გააცნეს, რის განხორციელებასაც "ქართული ოცნება" მომდევნო ოთხი წლის განმავლობაში გეგმავს. სოზარ სუბარმა მოსახლეობას არჩევნების მეორე ტურში მონაწილეობასა და ქართული ოცნების მაჟორიტარობის კანდიდატის მხარდაჭერისაკენ მოუწოდა.
ჭიათურაში „ქართული ოცნების“ მაჟორიტარობის კანდიდატი სულხან მახათაძე „თავისუფალი დემოკრატების“ კანდიდატ თეიმურაზ გაფრინდაშვილს დეზინფორმაციის გავრცელებაში ადანაშაულებს. "ქართული ოცნების" კანდიდატი სიცრუეს უწოდებს მისი კონკურენტის მიერ გავრცელებულ განცხადებას ამომრჩეველზე ზეწოლასთან დაკავშირებით და თეიმურაზ გაფრინდაშვილს ამომრჩევლის მოსყიდვაში ადანაშაულებს. გაფრინდაშვილი კი აცხადებს, რომ ხელისუფლება მეორე ტურში არჩევნების მოგებას ადმინისტრაციული რესურსის გამოყენებით გეგმავს.
სალომე ზურაბიშვილი სახელმწიფო აუდიტის წინააღმდეგ. მთაწმინდის რაიონის მაჟორიტარობის დამოუკიდებელმა კანდიდატმა სახელმწიფო აუდიტის სამსახური „ნაციონალური მოძრაობის“ ინტერესის გატარებაში დაადანაშაულა. მისი თქმით, შემოწირულობებსა და ამომრჩევლების შესაძლო მოსყიდვის ფაქტთან დაკავშირებით უწყება არასრულ და არასწორ ინფორმაციას მიზანმიმართულად ზურაბიშვილის კანდიდატურის დისკრედიტაციის მიზნით ავრცელებს. სალომე ზურაბიშვილის ადვოკატის, დიმიტრი გაბუნიას თქმით, აუდიტის სამსახურის შუალედურ ანგარიშზე დაყრდნობით მომზადდა სტატია, სადაც შემოწირულობების ნაწილთან ერთად საუბარი აუდიტის მხრიდან ზურაბიშვილის მიერ ამომრჩეველთა შესაძლო მოსყიდვის ფაქტზე დაწყებულ მოკვლევაზეც იყო. ადვოკატის თქმით, აუდიტის სამსახურს ფაქტის გასაჯაროების უფლება არ ჰქონდა. მთაწმინდის რაიონის დამოუკიდებელი კანდიდატი აუდიტის სამსახურს მოუწოდებს, რომ მისი მთავარი კონკურენტის, ნიკა რურუას მიმართ შემოწირულობითაც დაინტერესდეს.
თელავში ბატონის ციხის რეაბილიტაცია დასასრულს უახლოვდება. სასახლის ტერიტორიაზე დასრულებულია აივნის სვეტების მონტაჟი და კირით-ლესვითი სამუშაოები. ამჟამად ბატონის ციხეში ვიტრაჟებისა და განათების მონტაჟი მიმდინარეობს. პროექტი მსოფლიო ბანკისა და საქართველოს მთავრობის დაფინანსებით ხორციელდება. სასახლის სარეაბილიტაციო პროექტის ღირებულება 1 871 893 ლარია. მუზეუმში სარეაბილიტაციო სამშაოები 2017 წლის გაზაფხულზე დასრულდება
ბიზნესისა და ტექნოლოგიების უნივერსიტეტი შეზღუდული შესაძლებლობის მქონე პირების გადამზადებას იწყებს. პროექტი "ყველაფერი შესაძლებელია" შეზღუდული შესაძლებლობის მქონე პირებისთვის შეიქმნა და სხვადასხვა ორგანიზაციებში შემდგომი დასაქმების მიზნით, მათ უფასო გადამზადებას ითვალისწინებს. პროექტი შეზღუდული შესაძლებლობის მქონე პირების უფლებადამცველ ორგანიზაციასთან "კოალიცია დამოუკიდებელი ცხოვრებისთვის" ერთად ხორციელდება. პროექტის ორგანიზატორების თქმით, მოხდება შშმ პირებისთვის კვალიფიკაციის ამაღლება, რაც დასაქმებას, მათ რესოციალიზაციას და საზოგადოებაში ინტეგრირებას მოახდენს.
C ჰეპატიტის ელიმინაციის გეგმის განვითარების ხელშეწყობის მიზნით, საერთაშორისო მრჩეველთა ჯგუფმა მეორე შეხვედრა გამართა. კონფერენცია ჯანდაცვის მინისტრმა დავით სერგეენკომ და აშშ-ს ელჩმა საქართველოში იან კელიმ გახსნეს. საერთაშორისო მრჩეველთა ჯგუფის შეხვედრაზე ელიმინაციის პირველი ფაზის მიმდინარეობა შეაფასეს, წარადგინეს გრძელვადიანი სამოქმედო გეგმა, ვირუსის გავრცელების კვლევის შედეგები და სამომავლო პრიორიტეტული აქტვივობის დაგეგმვაზეც იმსჯელეს. მრჩეველთა ჯგუფი 11 უცხოელი ექსპერტისგან შედგება. საერთაშორისო მრჩეველთა ჯგუფის პირველი შეხვედრა გასული წლის ნოემბერში გაიმართა.
ძალა ნდობას - გიორგი მღებრიშვილის ინიციატივით ოჯახში ძალადობის პრევენციის მიზნით საინფორმაციო კამპანია დაიწყო. შინაგან საქმეთა სამინისტროს კამპანიის მიზანი ძალადობის და მასზე სამართლებრივად რეაგირების მექანიზმებთან დაკავშირებით საზოგადოების მეტად ინფორმირებაა. რა ღონისძიებებს გეგმავს მღებრიშვილის უწყება და რისკენ მოუწოდებენ მოქალაქეებს ოჯახური ძალადობის მსხვერპლი ქალები? ნიკა მუკბანიანი, გოჩა მერაბიშვილი დეტალებით.
უშიშროების საბჭოს ახალი მდივანი ჰყავს. გიორგი მარგველაშვილმა ირინა იმერლიშვილის შემცვლელად დავით რაქვიაშვილი დანიშნა. 2008-2012 წლებში რეინტეგრაციის საკითხებში სახელმწიფო მინისტრების - თემურ იაკობაშვილისა და ეკა ტყეშელაშვილის მოადგილე, ამერიკაში საქართველოს ელჩის მოადგილე, საზოგადოებრივ-საქმეთა ინსტიტუტის -ჯიპას ერთ-ერთი დამფუძნებელი და ალპინისტი, რომელსაც გიორგი მარგველაშვილთან ახლო ურთიერთობის 30 წლიანი გამოცდილება აკავშირებს - ასე წარუდგინა საზოგადოებას პრეზიდენტმა გუნდის ახალი წევრი. ანა ბროლაძე გვიერთდება პირდაპირ ეთერში უშიშროების საბჭოს ახალი მდივნის პირველი კომენტარით და იმ შეფასებებით, რომელიც მის დანიშვნას მოჰყვა. ანა გისმენთ.
ჩხრეკა ყოველგვარი დოკუმენტაციის გარეშე, ჩხრეკისას მოულოდნელად საკუთარ სახლში აღმოჩენილი მეხსიერების ბარათი, ცემა, წამება და მუქარა სასურველი ჩვენების მისაღებად - 2011 წელს ჯაშუშობის ბრალდებით დაკავებული გია გორელაშვილი მოწმის სტატუსით დაიკითხა. გორელაშვილმა ის პირები დაასახელა, ვინც მისი თქმით, მის წამებას ესწრებოდნენ, წარმების ის ფორმებიც დააკონკრეტა, რაც მის მიმართ იქნა გამოყენებული და გაიხსენა, რა ფორმით დაპირდნენ მოკვლას, თუ წინასწარ დაწერილ ჩვენებაზე ხელს არ მოაწერდა. მოწმემ ასევე მოყვა თუ რა მდგომარეობაში ნახა ნაწამები სერგო თეთრაძე, რომელიც ამავე ბრალდებით იყო დაკავებული. ოთხივე დაკავებული 5 წლის შემდეგ სააპელაციო სასამართლომ უდანაშაულოდ ცნო. დეტალებს კი გიორგი კობერიძე გიამბობთ.
დედოფლისწყაროთან მომხდარი ავტოსაგზაო შემთხვევის შედეგად გარდაცვლილი სამხედრო მოსამსახურე აკოფ მალხასიანი სამხედრო პატივით დაკრძალეს. დაკრძალვას თავდაცვის მინისტრი დაესწრო. ლევან იზორიამ გარდაცვლილი ოჯახის წევრებსა და ახლობლებს მიუსამძიმრა და განაცხადა, რომ დაღუპული ჯარისკაცის ოჯახს სამინისტრო მაქსიმალურად დაეხმარება. მინისტრის ინფორმაციით, ის ჯარისკაცები, რომლებიც ავტოსაგზაო შემთხვევისას დაშავდნენ, მკურნალობას სამხედრო ჰოსპიტალში განაგრძობენ. ავტოსაგზაო შემთხვევისას დაშავებული სამხედრო მოსამსახურეების შესახებ განცხადება გააკეთა ჯანდაცვის მინისტრმაც. დავით სერგეენკოს თქმით, არცერთის სიცოცხლეს საფრთხე არ ემუქრება.
სანდრა რულოვსის უარი არჩევნების მეორე ტურში მონაწილეობაზე - ზუგდიდში “ნაციონალური მოძრაობის” მაჟორიტარი დეპუტატობის კანდიდატმა გადაწყვეტილება მას შემდეგ მიიღო, რაც სამ უბანზე განმეორებითი არჩევნების შეჯამებისას გაირკვა, რომ ზუგდიდში მეორე ტური გაიმართება, პირველი ტურის შედეგების მიხედვით კი რულოვსი კონკურენტთან მარცხდება. რულოვსის გადაწყვეტილება მოულოდნელი და მიუღებელი აღმოჩნდა ნაციონალური მოძრაობის ნაწილისთვის, ნაწილი კი ღიად აცხადებს, რომ ყოფილი პირველი ლედის გადაწყვეტილება არჩევნების მეორე ტურში მათ მონაწილეობას დააზიანებს. როგორ აფასებენ რულოვსის, უკვე მაჟორიტარი დეპუტატობის ყოფილი კანდიდატის გადაწყვეტილებას პოლიტიკოსები და ექსპერტები - თამარ წიკლაური გიამბობთ.
ინციდენტი კრწანისის სასწავლო ცენტრში - თავდაცვის სამინისტროს ინფორმაციით, კრწანისის სამხედრო ბაზაზე სამმა პირმა შეჭრა სცადა. დაღუპულია ერთი ადამიანი. ლევან იზორიას უწყებაში აცხადებენ, რომ სამხედრო ბაზაზე შესვლას სამი უცნობი პირი ცდილობდა, ისინი გუშაგის მოთხოვნას - შეჩერებულიყვნენ, არ დაემორჩილნენ. თავდაცვის მინისტრი მიიჩნევს, რომ გუშაგი კანონიერად მოიქცა. გარდაცვლილის ოჯახის წევრები კი თავდაცვის სამინისტროს მიერ გავრცელებულ ინფორმაციას არ ენდობიან. დეტალები ნახეთ ლიკა ალელიშვილის რეპორტაჟში
ჩხრეკა ყოველგვარი დოკუმენტაციის გარეშე, ჩხრეკისას მოულოდნელად საკუთარ სახლში აღმოჩენილი მეხსიერების ბარათი, ცემა, წამება და მუქარა სასურველი ჩვენების მისაღებად - 2011 წელს ჯაშუშობის ბრალდებით დაკავებული გია გორელაშვილი მოწმის სტატუსით დაიკითხა. გორელაშვილმა ის პირები დაასახელა, ვინც მისი თქმით, მის წამებას ესწრებოდნენ, წარმების ის ფორმებიც დააკონკრეტა, რაც მის მიმართ იქნა გამოყენებული და გაიხსენა, რა ფორმით დაპირდნენ მოკვლას, თუ წინასწარ დაწერილ ჩვენებაზე ხელს არ მოაწერდა. მოწმემ ასევე მოყვა თუ რა მდგომარეობაში ნახა ნაწამები სერგო თეთრაძე, რომელიც ამავე ბრალდებით იყო დაკავებული. ოთხივე დაკავებული 5 წლის შემდეგ სააპელაციო სასამართლომ უდანაშაულოდ ცნო. დეტალებს კი გიორგი კობერიძე გიამბობთ.
,,სხვისი სახლი“ - ასე ჰქვია ფილმს, რომლის ჩვენება ქუთაისში აკაკი წერეთლის სახელობის უნივერსიტეტში შედგა. რუსუდან გლურჯიძის ფილმი 1990-იან წლებზე მოგვითხრობს და აფხაზეთის ომს ეხება. ქართველებისა და აფხაზებისთვის მტკივნეული თემა რეჟისორმა მაყურებელს, როგორც თავად ამბობს, განსაკუთრებული სიფრთხილით და რეალური სიუჟეტით წარუდგინა. ფილმმა საერთაშორისო ასპარეზზე წარმატება უკვე მოიპოვა. ფილმი კარლოვი ვარის კინოფესტივალის გამარჯვებულია. ირაკლი აკობია დეტალებით.
“ნაციონალურ მოძრაობას” არჩევნებისას ქონდა ორი დირექტივა გაცემული. რაც შეიძლება ბევრი ბიულეტენისთვის შეექმნათ ტექნიკური პრობლემა, მათ გასაბათილებლად და ეგზიტპოლების შედეგების ასარევად ეთქვათ, რომს ხმას სხვა პარტიას მისცეს” - ამ განცხადებას კინო რეჟისორი გოგა ხაინდრავა აკეთებს. მისი თქმით, სწორედ ამ კამპანიის გაგრძელებაა საკონსტიტუციო უმრავლესობის საკითხზე ხელოვნურად აგორებული თემა, თითქოს საკონსიტუციო უმრავლესობა ქვეყნისთვის დამღუპველია. რეალურად კი, ხაინდრავას თქმით, ამით “ნაციონალური მოძრაობა” მეტი ხმის მოპოვებას ცდილობს. ამასთან “ჰეროკრატიის” რეჟისორის განცხადებით, მიხეილ სააკაშვილის პარტიის რეალური სახე მის ფილმში ჩანს, რომელიც დოკუმენტური მასალაზე დაყრდნობითაა გადაღებული და სადაც ხელისუფლების მხრიდან, მათ ოჯახის წევრებზე მუქარის გამო, პატიმრები იძულებულები იყვნენ თავი ჩამოეხრჩოთ. კინო რეჟისორი მეორე ტურთან დაკავშირებითაც აფიქსირებს პოზიციას და ნიკა რურუასა და სანდრა რულოვსისა კანდიდატურებს აფასებს.
სოფელ რუისთან მდებარე აგრარული ბაზრობის პავილიონების კომპლექსი ფონდმა ქართუმ ქარელის მუნიციპალიტეტს გადასცა. კომპლექში, რომელიც სამ პავილიონს აერთიანებს, ასამდე სავაჭრო ადგილია. ავტომაგისტრალის გასწვრივ აშენებულ პავილიონებში ადგილობრივებს სოფლის მეურნეობის პროდუქტის გაყიდვა უსაფრთხო და კომფორტულ გარემოში შეეძლებათ. რუისში აგრარული ბაზრობის მოწყობის საჭიროება მას შემდეგ გაჩნდა, რაც ავტობანის სახლოვეს მოსახლეობის მიერ თვითნებურად განლაგებული სავაჭრო ობიექტები საავტომობილო ტრანსპორტისათვის სახიფათო ზონად გადაიქცა და ავტოსაგზაო შემთხვევები გახშირდა. ნოდარ სხირტლაძის რეპორტაჟი ქარელის რაიონიდან.
გააუქმებს თუ არა თავდაცვის მოქმედი მინისტრი წინამორბედის გადაწყვეტილებას და აღდგება თუ არა სამხედრო სავალდებულო გაწვევა, კითხვაზე პასუხი ამ დრომდე უცნობია. ლევან იზორია საკითხის შესწავლას განაგრძობს, საბოლოო გადაწყვეტილება კი საზოგადოებისთვის ცნობილი მას შემდეგ გახდება, რაც თავდაცვის მინისტრი ექსპერტებისა და არასამთავრობო სექტორის პოზიციას მოისმენს. როგორი გამოხმაურება მოჰყვა ლევან იზორიას განცხადებას სამხედრო ექსპერტებისა და პოლიტიკური პარტიების მხრიდან, დეტალებს ლიკა ალელიშვილი გაგვაცნობს.
ქუთაისში ერთ–ერთი ყველაზე დიდი ქუჩის რეაბილიტაცია დასრულდა. განახლებული ნიკეას ქუჩა რეგიონული განვითარებისა და ინფრასტრუქტურის მინისტრმა გახსნა. პროექტის ფრაგლებში სრულად განახლდა გზის საფარი და გამოიცვალა მიწისქვეშა კომუნიკაცია. თორნიკე ხურციძე დეტალებით ქუთაისიდან.
კანოეს ფედერაცის პრეზიდენტი დავით ქაცარავა თბილისის მერიას უპირისპირდება. მიზეზი მერიის მიერ კანოეს ფედერაციისთვის 2 350 ლარის გადარიცხავაზე უარის გახდა, თანხა კი როგორც ქაცარავა განმარტავს ფოთში კანოეს გუნდის გამგზავრებისთვის იყო საჭირო. თბილისის მერიაში ქაცარავას ბრალდების საპასუხოდ ამბობენ, რომ თბილისის მერიას გაუთვალისწინებელი ხარჯის გაღება მოუხდა, სწორედ ამის გამო ვერ მოხდა ფედერაციისთვის თანხის გადარიცხვა. თუმცა, მერიის წარმომადგენელთა თქმით, მათთვის ფინანსური მხარდაჭერა არაერთხელ აღმოუჩენიათ. რეზი ხუციშვილი დეტალებით.