ხვალ მეცხრე მოწვევის პარლამენტის პირველი სხდომაა ჩანიშნული. საქართველოს პრეზიდენტმა განკარგულება, რომლის მიხედვითაც სხდომა 18 ნოემბერს, 12 საათზე გაიმართება, უკვე გამოსცა. პრეზიდენტი ხვალვე პარლამენტთან თანამშრომლობის ახალ ფორმატზე გააკეთებს განცხადებას, მანამდე კი პარლამენტში პირველი სხდომისთვის ემზადებიან. რა პროცედურებით წარიმართება ხვალ პარლამენტში სხდომა, ვინ წარუძღვება მას პარლამენტის თავმჯდომარის არჩევამდე ჩვენი კორესპონდენტი ირაკლი აკობია ისაუბრებს ქუთაისიდან პირდაპირ ეთერში. ირაკლი გისმენთ.
“მინდა დაგემშვიდობოთ ამ სტატუსით, თუმცა, შევხვდებით კვლავაც” - ასე დაემშვიდობა დავით უსუფაშვილი მედიის წარმომადგენლებს, რომლებთანაც მან დღეს 4 წლიანი საპარლამენტო საქმიანობა შეაჯამა. 1 505 კანონი, 5 000-მდე დადგენილება და რამდენიმე ათასი დოკუმენტი - ასეთია 4 წლის განმავლობაში საკანონმდებლო მუშაობის შეჯამება რიცხვებში. დღესვე უსუფაშვილმა სამომავლო გეგმებზე კიდევ ერთხელ ისაუბრა. მისი თქმით, ის მზად არის სერიოზულ საქმეზე სერიოზულ ხალხთან სერიოზული საუბრისთვის, მთავარ ორიენტირად კი 2020 წლის საპარლამენტო არჩევნები დაასახელა. პარლამენტის თავმჯდომარის რანგში დავით უსუფაშვილმა მუშაობა მედიის წარმომადგენლებთან ერთად ფოტოსურათის გადაღებით დაასრულა.
დიასპორის საკითხებში სახელმწიფო მინისტრის აპარატი უქმდება. გადაწყვეტილება მთავრობის დღევანდელ სხდომაზე ოფიციალურად მიიღეს. თუმცა, თავად აპარატი საგარეო საქმეთა სამინისტროს შეუერთდება და დეპარტამენტად გადაკეთდება. მინისტრის რანგში გელა დუმბაძემ ბოლო ოფიციალური ღონისძიება გამართა. კონფერენციას – „ქართული დიასპორა - დღევანდელობა და გამოწვევები“ ემიგრანტებთან ერთად მთავრობის წევრები, მათ შორის საგარეო საქმეთა მინისტრიც ესწრებოდა. რა ხედვები აქვს მიხეილ ჯანელიძეს ახალი დეპარტამენტის მიმართ და როგორია არასამთავრობო სექტორისა და დიასპორის წარმომადგენლების დამოკიდებულება? - გენო ოსიყმაშვილი, სერგი ბარამიძე დეტალებით.
მინისტრთა კაბინეტი მოქმედი შემადგენლობით ბოლოჯერ შეიკრიბა. 21 ნოემბერს მთავრობის ახალი შემადგენლობა გახდება ცნობილი, რომელსაც ნდობა პარლამენტმა უნდა გამოუცხადოს. პრემიერ-მინისტრმა, გიორგი კვირიკაშვილმა მთავრობის წევრებს თანამშრომლობისთვის მადლობა გადაუხადა და აღნიშნა, რომ მათთან ერთად გავლილი თითეული დღე ეამაყება. გიორგი კვირიკაშვილმა მადლობა გადაუხადა მის წინამორბედებსაც, ირაკლი ღარიბაშვილს და ბიძინა ივანიშვილს. პრემიერის შეფასებით, ბიძინა ივანიშვილმა საქართველოს პოლიტიკასა და ქვეყნის მართვაში თვისობრივი გარდატეხა მოახდინა. გიორგი კვირიკაშვილმა მთავრობის დღევანდელ სხდომაზე გასული ოთხი წელი შეაფასა და აღნიშნა, რომ შიდა თუ გარე გამოწვევების მიუხედავად, ხელისუფლებისთვის პრიორიტეტი ყოველთვის ადამიანი იყო. პრემიერის განცხადებით, საერთაშორისო ინსტიტუტების რეიტინგების მიხედვით, საქართველოს როგორც დემოკრატიის, ისე ეკონომიკის განვითარების მაჩვენებლის მიხედვით წინსვლა აქვს.
"ნატო-საქართველოს სწავლება 2016”-ს პრემიერი და პრეზიდენტი სტუმრობდნენ. კრწანისის სასწავლო ცენტრში, წვრთნების მონაწილეებისადმი მიმართვისას პრემიერმა აღნიშნა, რომ წვრთნები არავის წინააღმდეგ არ არის მიმართული და რეგიონში უსაფრთხოების გაძლიერებას ემსახურება. შეგახსენებთ, ნატო-საქართველოს წვრთნებისადმი უარყოფითი დამოკიდებულება რუსეთმა საჯაროდ გამოხატა. სწავლების მიმდინარეობის დეტალები, მნიშვნელობა და შეფასებები, ნახეთ ლიკა ალელიშვილისა და ჯაბა ჩიტიძის რეპორტაჟში.
ტერაქტის მომზადების საქმეში ბრალდებულები დანაშაულს არ აღიარებენ და აცხადებენ, რომ ყოველთვის სამშობლოს ინტერესიდან გამომდინარე მოქმედებდნენ. თუმცა, ერთერთი ბრალდებული ბექა ბექაური აცხადებს, რომ იარაღი მას ეკუთვნოდა, თუმცა სხვა გეგმა ჰქონდა. მისი თქმით, ოკუპანტების წინააღმდეგ ბრძოლა დანაშაული არ არის. ბრალდებულმა ჯაბა მელქაძემ კი განაცხადა, რომ რის აფეთქებასაც აპირებდა, იმას დღესაც ააფეთქებდა. საქმე ეხება სოფელ საგურამოში რუსეთ-სომხეთის დამაკავშირებელი მილსადენის აფეთქების მცდელობას. ტერორისტული აქტის ჯგუფურად მომზადებისათვის, საბრძოლო მასალის უკანონოდ შეძენა-შენახვა, ტარებისა და დანაშაულის ჩადენაში დახმარებისთვის ბრალდებულია 7 პირი.
ე.წ. ნავთლუღის სპეცოპერაციის საქმეზე ბრალდებულების დათა ახალაიას და გია დგებუაძის ადვოკატების მიერ წარმოდგენილი მოწმე, ახალაიას მიერ საკონტროლო გასროლას უარყოფს. კუდ-ის ყოფილი თანამშრომელი დავით კუხიანიძე, რომელიც უკრაინაში იმყოფება და სპეცოპერაციის მონაწილეა, მოწმის სტატუსით სკაიპით დაიკითხა. კუხიანიძემ განაცხადა, რომ ის ავტომანქანით ნავთლუღის ავტოსადგურის ტერიტორიაზე იყო მისული და გაიგო სროლის ხმა, ტერიტორიაზე შესვლისას კი, მისი თქმით, ახალგაზრდები გარდაცვლილები იყვნენ. პროკურორის შეკითხვაზე აქვს თუ არა ინფორმაცია პირველი სროლისას სად იყვნენ ახალაია და დგებუაძე, მოწმემ განაცხადა რომ ინფორმაცია არ აქვს. მოწმე ამტკიცებს, რომ საქართველოში ყოფნისას პროკურატურა მასზე ზეწოლას ახდენდა. თუმცა, საქმის პროკურორების განცხადებით მოწმემ დღევანდელ პროცესზე დაადასტურა, რომ მის მიერ გამოძიებისთვის მიცემული მამხილებელი ჩვენება სწორედ მას ეკუთვნის.
პროკურატურამ განაჩენის გადასინჯვის გადაწყვეტილება მიიღო გენერალ თამაზ ნინუას და მისი მეუღლის ეთერ ნინუას მკვლელობისთვის მსჯავრდებულის თამაზ გოგიას მიმართაც. გოგიას, 2010 წლის 13 აგვისტოს განაჩენით მკვლელობისთვის 17 წლით თავისუფლების აღვეთა მიესაჯა. თუმცა ახალი გამოძიების პირობებში ჩატარებული ექსპერტიზებით თამაზ გოგიას ხელის ანაწმენდებზე დენთის კვალის არსებობა გამოირიცხა, რამაც იმ მტკიცებულების რელევანტურობა დააყენა ეჭვქვეშ, რომლის საფუძველზეც განაჩენი დადგა.
კიდევ ერთი განაჩენი, რომელსაც პროკურატურა გადასინჯავს, ნორა კვიციანის საქმეა. ირაკლი შოთაძის უწყებამ ხელახალი გამოძიების ფარგლებში დაადგინა, რომ სოფელ აჟარის ყოფილი გამგებელი უდანაშაულო იყო. მთავარი პროკურატურის ინფორმაციით, ნორა კვიციანი ყალბი მტკიცებულებების გამოყენებით უკანონოდ იყო დაკავებული. მთავარი პროკურატურა ყოფილი პოლიტპატიმრის მიმართ გამოტანილი განაჩენების გადასინჯვის მოთხოვნით სააპელაციო სასამართლოს რამდენიმე დღეში მიმართავს. ვის ინტერესში შედიოდა ნორა კვიციანის პატიმრობა - ნიკა მუკბანიანი გიამბობთ
სამი გახმაურებული საქმე და სამი გადახედილი განაჩენი - მთავარმა პროკურატურამ განაჩენების გადახედვის გადაწყვეტილება გია გვიჩინის, ნორა კვიციანისა და ნინუების მკვლელობის საქმეებზე მიიღო. გამართლდება თუ არა გია გვიჩიანი, ამჯერად სააპელაციო სასამართლოაზეა დამოკიდებული, რომელსაც მთავარმა პროკურატურამ უკვე მიმართა. რა გამოიკვეთა გვიჩიანის საქმის ხელახალი გამოძიებისას და რატომ მიიჩნევს თბილგაზის ყოფილი დირექტორის ოჯახი გია გვიჩიანს სააკაშვილს პატიმრად - რეზი ხუციშვილი გიამბობთ.
თიბისი გალერეაში გამოფენა “რაგბი ჩვენი თამაშია” გაიმართა. ფოტოგრაფ გოგიტა ბუხაიძემ, 2002 წლიდან, ამ დრომდე გადაღებული, 40-მდე ფოტო გამოიფინა. გამოფენაზე წარმოდგენილი იყო საქართველოს რაგბის ეროვნული ნაკრების მატჩების ამსახველი ფოტოები. გამოფენას ეროვნული ნაკრების წევრები ესწრებოდნენ. გიორგი ბეგაძის თქმით, მსგავსი აქტივობები, ნაკრებისთვის მნიშვნელოვანი და დასამახსოვრებელია.
მორიგი სკანდალი ქართულ ფეხბურთში, საქმე კვლავ გარიგებულ მატჩებს ეხება. ფეხბურთის ფედერაციის სადისციპლინო და დავების განმხილველი კომიტეტის გადაწყვეტილებით, პირველი ლიგის ორი კლუბი ხონის „იმერეთი" და ცხინვალის „ლიახვი" გარიგებულ მატჩში მონაწილეობისთვის დაისაჯა. უეფა-ს თაღლითური ფსონების ამოცნობის სისტემის ანგარიშით, 8 ნოემბერს, ხონის „იმერეთისა" და ცხინვალის „ლიახვის" შეხვედრაზე, სხვადასხვა უცხოურ ტოტალიზატორებში საეჭვო მანიპულირება მოხდა, რის გამოც მატჩის შედეგი გაუქმდა. ხონის „იმერეთი" უეფას ანგარიშში მეორედ მოხვედრის და სხვა მამხილებელი გარემოებების გამო მოიხსნა გათამაშებიდან, გაუნულდა აქამდე დაგროვილი ქულები და პირველი ლიგის დარჩენილ მატჩებში ჩაეთვლება წაგება 0:3. ხონის გუნდის მენეჯერ სოსო ჩაკვეტაძეს კი სამუდამოდ აეკრძალა ფეხბურთთან დაკავშირებული საქმიანობა. 10 000 ლარით დაჯარიმდა ცხინვალის „ლიახვი" და გათამაშებაში 6 ქულა ჩამოაკლდა.
ბარაკ ობამას გერმანიაში ელოდებიან, სადაც აშშ-ის მოქმედი პრეზიდენტი ევროპელ ლიდერებთან მოლაპარაკებებს გამართვას. ობამა ბერლინში ათენიდან გაემგზავრა. ბოლო ტურნეს ფარგლებში, მოქმედი პრეზიდენტი, ცდილობს დაარწმუნოს მოკავშირეები, რომ ამერიკის შეერთებული შტატების პოლიტიკა არჩევნების შემდეგ უცვლელი დარჩება. პრეზიდენტის რანგში ბარაკ ობამას ბოლო ტურნეს დეტალები ნახეთ ქეთი ჩოხელის რეპორტაჟში.
მიღება პარლამენტის თბილისის შენობაში და მერვე და მეცხრე მოწვევის დეპუტატები ერთად. მიღება ტოლერანტობის დღეს მიეძღვნა, თუმცა მთავარი საკითხი, მაინც ახალი მოწვევის პარლამენტის სამუშაო გეგმები და სტრატეგია იყო. მიშა ფეიქრიშვილი დაინტერესდა, რა რეკომენდაციები და რჩევები აქვთ უკვე ყოფილ დეპუტატებს ახალი პარლამენტარების მისამართით. რა გეგმები აქვს ახალ სახეებს და რა რჩევას აძლევს პრემიერ-მინისტრი საკანონმდებლო ორგანოს წევრებს - მიშა ფეიქრიშვილი ისაუბრებს პირდაპირ ეთერში.
ცენტრალურმა საარჩევნო კომისიამ 2016 წლის საპარლამენტო არჩევნების საბოლოო, შემაჯამებელი ოქმი გამოაქვეყნა. ოქმი, ძალაში, საკანონმდებლო მაცნეზე გამოქვეყნების შემდეგ შევა. საკანონმდებლო მაცნეზე” ოქმის გამოქვეყნების შემდეგ, პრეზიდენტი უფლებამოსილია მეცხრე მოწვევის პარლამენტის თარიღი გამოაცხადოს. გიორგი მარგველაშვილმა სხდომა 19 ნოემბრამდე უნდა ჩანიშნოს. არჩევნების საბოლოო შედეგების ამსახველ დოკუმენტს ხელი ცესკო-ს თავმჯდომარემ, თამარ ჟვანიამ მოაწერა. საბოლოო მონაცემების თანახმად, ამომრჩეველთა ერთიან სიაში რეგისტრირებული 3 513 884 ამომრჩევლიდან, პროპორციული საარჩევნო სისტემით ჩატარებულ არჩევნებში მონაწილეობა 1 825 054-მა მიიღო. საბოლოო მონაცემებით, გაბათილდა 10 უბნის შედეგები. 5%-იანი ბარიერი სამმა პარტიამ გადალახა. მოგებული მაჟორიტარული ოლქების გათვალისწინებით, ჯამში “ქართულ ოცნებას” პარლამენტში 115 დეპუტატი ეყოლება, “ნაციონალურ მოძრაობას” 27, პატრიოტთა ალიანსს - 6. ახალ პარლამენტში იქნება ერთი დამოუკიდებელი დეპუტატი და ერთიც “მრეწველობა გადაარჩენს” საქართველოს პარტიის მაჟორიტარი.
სურსათის ეროვნული სააგენტო ხორცის მწარმოებლებისთვის ახალ რეგულაციებს გეგმავს. 2017 წლის იანვრიდან ხორცპროდუქტების ეტიკეტირება სავალდებულო გახდება. რა რეგულაციები უწესდებათ მწარმოებლებს და რა ინფორმაცია უნდა იყოს მითითებული ეტიკეტზე. როგორია სურსათის უვნებლობის სამსახურის პოზიცია და რას ფიქრობენ გამყიდველები, მაკა ლაშხია გიამბობთ.
გირჩის ულტიმატუმი და ვადად დაწესებული 45 დღე - ახალი პოლიტიკური ცენტრი მთავრობასა და პარლამენტს ნარკოპოლიტიკის გადახედვისა და შემსუბუქებისკენ მოუწოდებს. დეკრიმინალიზაციის შემდეგ გირჩმა ამჯერად მარიხუანისა და მისგან დამზადებული პროდუქტების მოხმარების, ასევე მისი კულტივირებისა და პირადი მოხმარებისთვის შენახვის ლეგალიზება მოითხოვა. გირჩი ხელისუფლებას ვადას 31 დეკემბარმდე აძლევს, წინააღმდეგ შემთხვევაში აანონსებენ, რომ 31 დეკემბერს ზუსტად 23 საათსა და 59 წუთზე ისინი პირდაპირ ეთერში საკუთარ ოფისში მარიხუანას დარგავენ. რას პასუხობენ ქართულ ოცნებაში გირჩებს და როგორია თემაზე ოპოზიციური პარტიებისა და არასამთავრობო სექტორის პოზიცია ნახეთ თამარ წიკლაურის რეპორტაჟში.
სოციალურად დაუცველებისთვის კომუნალური გადასახადების სუბსიდირების გაცემის წესი იცვლება. კომუნალური მომსახურებისთვის საჭირო თანხა მოქალაქეების ნაცვლად ორგანიზაციებს ჩაერიცხებათ. თუმცა, დახარჯული ელექტროენერგიისა და დასუფთავების საფასურის ანაზღაურება კვლავინდებურად სრულად მოხდება. ოპოზიცია ამტკიცებს, რომ მერიამ სოციალურად დაუცველებს დაფინანსება შეუმცირა. რა პასუხი აქვს თბილისის მერიას, რა ფორმით მოხდება კომუნალური გადასახადების სუბსიდირება მარიამ სეთურიძე და გიორგი კიკვაძე გიამბობთ.
ბესიკ უდესიანის და ალექსანდრე მუხაძის მიერ ბესიკ ხარძიანის წამების და კუს ტბის წილების დათმობის ეპოზოდზე საქალაქო სასამართლოში საქმის არსებითი განხილვა დაიწყო. ბრალდების მხარემ, შესავალ სიტყვაში მოყვა, თუ რა გზით ცდილობდა უდესიანი ხარძიანისთვის წილების დათმობაზე თანხმობა მიეღო. სხდომა დაცვის მხარის თხოვნით გადაიოდა. პროცესს, უდესიანი და მუხაძე არ ესწრებოდნენ, რადგან მათზე ძებნაა გამოცხადებული. შემდეგი სხდომა 22 ნოემბერს დაცვის მხარის შესავალი სიტყვით განახლდება, არ არის გამორიცხული ამავე პროცესზე ბრალდების მხარის მოწმეების დაკითხვაც მოხდეს.
შეცვლილი პოზიცია ევროკავშირისა და ევროატლანტიკური სტრუქტურების პოლიტიკის მიმართ. საქართველოს საპატრიარქო ბრიუსელში რამდენიმე დღიან ვიზიტს აჯამებს და აცხადებს, რომ საპატრიარქოს არასწორი წარმოდგენა ჰქონდა ევროატლანტიკური სტრუქტურების პოლიტიკაზე. ასეთ საკითხებს შორისაა სასწავლო დაწესებულებებში რელიგიიის სწავლება და ქორწინების ცნების განსაზღვრება. რა გახდა საპატრიარქოს შეხედულების შეცვლის მიზეზი და თემებზე, რომელიც საპატრიარქოს პრობლემატურ საკითხად მიაჩნია, რას ამბობენ, ხელისუფლებასა და ოპოზიციაში - გიორგი კობერიძე გიამბობთ.
ჰქონდა თუ არა მიხეილ სააკაშვილს 2007 წლის 7 ნოემბერს ჯარის გამოყვანის უფლება, აქციის დაშლის შემდეგ, რატომ გასცეს, რუსთაველის გამზირის, უკვე დარბეული ხალხისგან გაწმენდის ბრძანება და მოხდა თუ არა შეიარაღებული ძალების არასანქცირებული გამოყენება? აქციის დარბევისა და ტელეკომპანია იმედის დახურვის საქმეზე საქალაქო სასამართლოს ჩვენება, შეიარაღებული ძალების გენშტაბის ყოფილმა უფროსმა მისცა. როგორ იხსენებს კუდ-ის ყოფილი თანამშრომელი 7 ნოემბრის ღამეს და მისი დაკითხვის შემდეგ, რა მიზეზით დაიხურა სასამართლო პროცესი?! ნიკა მუკბანიანი და არჩილ ვაჟიკაშვილი გიამბობთ.
უკრაინის უმაღლესი რადას დეპუტატი ვადიმ რაბინოვიჩი მიხეილ სააკაშვილისთვის უკრანის მოქალაქეობის ჩამორთმევასა და საქართველოში მის ექსტრადირებას ითხოვს. რაბინოვიჩის თქმით, ოდესის საოლქო ადმინისტრაციის ყოფილი ხელმძღვანელის ექსტრადირების საკითხის განხილვის თხოვნით გენერალურ პროკურატურასა და შსს-ს უკვე მიმართა. რაბინოვიჩი, საქართველო უკარაინას შორის, საერთაშორისო დამნაშავეების გადაცემის შესახებ გაფორმებულ შეთანხმებას იხსენებს და ამბობს, რომ უკრაინას საქართველოსთან ერთი ადამიანის გამო უთანხმოება არ უნდა ჰქონდეს. უკვე ცნობილია, რომ დეპუტატმა პრეზიდენტ პეტრო პოროშენკოს სააკაშვილისთვის მოქალაქეობის ჩამორთმევის თხოვნითაც მიმართა.
თურქეთსა და ევროკავშირს შორის დაძაბულობა პიკს აღწევს. ერდოღანი ბრიუსელს მიმდინარე წლის ბოლომდე ვადას აძლევს. თუ სავიზო რეჟიმი არ გაუქმდება, თურქეთი მიგრაციულ შეთანხმებას შეაჩერებს. ამასთან, შესაძლოა ანკარამ რეფერენდუმზე გაიტანოს ევროკავშირში გაწევრიანების პროცესის გაგრძელების საკითხი. ქეთი ჩოხელი დეტალებით.
ბათუმში, კაფე "ფანტაზიას", იგივე "რვაფეხას" რესტავრაცია უახლოეს პერიოდში დაიწყება. "რვაფეხას" რესტავრაციაზე მოლაპარაკებები ფონდ "ქართუსთან" მიმდინარეობს, გადაწყვეტილება თითქმის მიღებულია. საბჭოთა პერიოდის ერთ-ერთმა ყველაზე პოპულარულმა ქართულმა არქიტექტურულმა ნაგებობამ, ფუნქციონირება 90-იან წლებში შეწყვიტა, დროთა განმავლობაში კი შენობა დანგრევის საფრთხის წინაშეც დადგა. სოფო ჟღენტი, ნათია ხართიშვილი დეტალებით.
რამდენიმე დღეა რაც თბილისის ოპერისა და ბალეტის თეატრის სამხატვრო ხელმძღვანელის თანამდებობა ბადრი მაისურაძემ დაიკავა. როგორ ემზადება რუსეთის დიდ თეატრში მოღვაწე ქართველი ტენორი საქართველოს მთავარი მუსიკალური თეატრის ხელმძღვანელობისთვის, როგორ აპირებს ბადრი მაისურაძე მსოფლიო საოპერო სივრცეში საქართველოს სახელის დამკვიდრებას და როგორ აფასებს მას მუსიკალური საზოგადოება ნახეთ მაკა ლაშხიას რეპორტაჟი.
რას გულისხმობს განათლების სამინისტროს ახალი სტრატეგია? ამ თემაზე სასაუბროდ მინისტრმა მედიის წარმომადგენლებს უმასპინძლა. საათ-ნახევრიანი შეხვედრისას საუბარი ძირითადად მასწავლებლების კვალიფიკაციის ამაღლებას, დაწყებით და საშუალო კლასებში სკოლის მოსწავლეებისთვის სასწავლო პროგრამებისა და საშინაო დავალებების მოცულობის შემცირებას შეეხო. განათლებისა და მეცნიერების მინისტრის ხედვით, სკოლამ საზოგადოებაზე ორიენტირებული პიროვნება უნდა აღზარდოს და არა გამოცდების გადალახვაზე მოტივირებული მოსწავლე. ამასთან, განათლების სამინისტროს ახალი სტრატეგია პროფესიულ სწავლებებსაც ეხება. კერძოდ ახალი კანონის მიხედვით სკოლის მოსწავლეებს შეეძლებათ მაღალ კლასებში სწავლის პარალელურად პროფესიულ სასწავლებლებშიც დაეუფლონ განათლებას, შემდგომ კი უმაღლესში ჩააბარონ.
თბილისის 2017 წლის ბიუჯეტის პროექტი დედაქალაქის საკრებულოში შევიდა. ბიუჯეტის რაოდენობა 800 მილიონი ლარით არის განსაზღვრული. დედაქალაქის მთავარი ფინანსური დოკუმენტის გასაცნობად და შენიშვნების გამოსათქმელად საკრებულოს დეპუტატებს 10 დღიანი ვადა აქვთ. მიუხედავად იმისა, რომ დოკუმენტს ჯერ არ გაცნობიან, ოპოზიციის ნაწილი აცხადებს, რომ ბიუჯეტის პროექტს მხარს არ დაუჭერს, რადგან მის შედგენაში ჩართულები არ ყოფილან და პროექტი მოსახლეობის ინტერესს არ პასუხობს. რა პასუხი აქვს დედაქლაქის მერს, რა პრიორიტეტებზე იქნება მორგებული თბილისის მთავარი ფინანსური დოკუმენტი,
ალექსი პეტრიაშვილის დაჭრაში ბრალდებულ ლევან მექვაბიშვილს 12 წლით თავისუფლების აღკვეთა მიესაჯა. თბილისის საქალაქო სასამართლომ განაჩენი გამოიტანა. მოსამართლემ პროკურატურის მტკიცებულებები სრულად გაიზიარა, რომლის მიხედვითაც 2016 წლის 26 თებერვალს თბილისში, უნივერსიტეტის ქუჩაზე მდებარე ძმათა სასაფლაოზე ლევან მექვაბიშვილი კიდევ ერთ პირთან ერთად თავს დაესხა ალექსი პეტრიაშვილს და განსაკუთრებული სისასტიკით, ჯგუფურად, მეტალის ჩაქუჩითა და ე.წ. „ბეისბოლის ჯოხით“ სცემეს და ცეცხლსასროლი იარაღიდან მრავალჯერადი გასროლის შედეგად მძიმე დაზიანებები მიაყენეს, რის შემდეგაც მიიმალნენ. პროკურორის განმარტებით, საქმეში სხვა დამნაშავებიც არსებობენ და დამკვეთი, რომლების მიმართაც სისხლის სამართლის წარმოება ცალკეა გამოყოფილი და საგამოძიებო სამუშაოები მიმდინარეობს.
შინაგან საქმეთა სამინისტრომ 10 თვის ჩვილზე განხორციელებული ძალადობის ფაქტზე ბავშვის ძიძა დააკავა, თუმცა, დღესვე პროკურატურის შუამდომლობის საფუძველზე, თბილისის საქალაქო სასამართლომ წინასწარი პატიმრობის ნაცვლად, აღკვეთი ღონისძიების სახით ათას ლარიანი გირაო შეეფარდა. ფსიქოლოგები კი ბავშვებზე გახშირებულ ძალადობაზე საუბრობენ. რეზი ხუციშვილი გიამბობთ.
ინტერნეტის თავისუფლების კუთხით საქართველო პირველ ათეულშია. შესაბამის ანგარიშსს საერთაშორისო ორგანიზაცია “ფრიდომ ჰაუსი” აქვეყნებს, რომლის მიხედვითაც 65 ქვეყანას შორის, ინტერნეტის სივრცის თავისუფლების ინდექსით საქართველო მეათე პოზიციაზეა. დოკუმენტის თანახმად, საქართველოს 25 ქულა აქვს. ანგარიშში საქართველო ისეთ ქვეყნებს უტოლდება, როგორიცაა საფრანგეთი და იტალია. რა კრიტერიუმით განსაზღვრავს Freedom House ინტერნეტის თავისუფლების ხარისხს და როგორ შეფასდა ხელისუფლების ნაბიჯები საერთაშორისო ორგანიზაციის ანგარიშში, მარიამ სეთურიძე და გიორგი კიკვაძე დეტალებით.
საქართველოში შექმნილი ვითარება არის უკიდურესად პოზიტიური, ამიტომ საჭიროა ევროკავშირის მხრიდან ვიზალიბერალიზაციის მხარდაჭერა - განცხადება ევროკავშირის უმაღლეს კომისარს, ფედერიკა მოგერინის ეკუთვნის. მისი თქმით, საქართველოსა და უკრაინის ვიზალიბერალიზაციის პროცესი ევროკავშირისთვის პრიორიტეტია. მოგერინი ევროკავშირის საბჭოს, შესაბამისი პროცედურების დაჩქარებისკენ მოუწოდებს. საბჭოს განცხადების მიხედვით კი, ევროკავშირი აღიარებს იმ პროგრესს, რომელსაც პარტნიორმა ქვეყნებმა მიაღწიეს და მნიშვნელოვანია, რომ საქართველოსა და უკრაინისთვის ვიზალიბერალიზაციის პროცესი დროულად დასრულდეს.
ნატო-საქართველოს ერთობლივი წვრთნებით შეშფოთებული რუსეთი და ნატო-ს პასუხი მოსკოვს. ოფიციალური მოსკოვი მიიჩნევს, რომ ნატო- საქართველოს ერთობლივი წვრთნა რეგიონში მშვიდობისა და სტაბილურობისთვის სერიოზული საფრთხეა. რუსეთს თავად ნატო-ს გენერალურმა მდივანმა უპასუხა. იენს სტოლტენბერგის განცხადებით, ნატო საქართველოსთან მუშაობას გააგრძელებს. რუსეთის საგარეო საქმეთა სამინისტროს განცხადებას, ქართველი პოლიტიკოსებისა და ექსპერტების შეფასებები მოჰყვა. ლიკა ალელიშვილი დეტალებით.
კიევში ხელისუფლების პოლიტიკის წინააღმდეგ ორი მიტინგი გაიმართა. უკრაინული მედიის ინფორმაციით, კონსტიტუციის მოედანზე, პარლამენტის შენობასთან ასობით ადამიანი შეიკრიბა. კიდევ ორი ათასამდე დემონსტრანტი იმყოფებოდა უკრაინის ნაციონალური ბანკის შენობასთან. მათი ნაწილი დაზარალებული მეანაბრე იყო. კიევის პოლიციის მონაცემებით, აქციებში სულ ექვსი ათასამდე ადამიანი მონაწილეობდა. უკრაინის დედაქალაქში გამკაცრებულია უსაფრთხოების ზომები. წესრიგს სამართალდამცველებთან ერთად უკრაინის ნაციონალური გვარდიის ხუთი ათასი სამხედრო უზრუნველყოფს. მიმდინარე კვირის განმავლობაში კიევში ათამდე საპროტესტი აქციაა დაგეგმილი.
“ისევ გრძელდება ორგანიზებული კამპანია ნაციონალური მოძრაობის წინააღმდეგ პარტიის რამდენიმე მოქმედი თუ ყოფილი მხარდამჭერის ან ლიდერის მხრიდან” - ასე იწყება, სოციალურ ქსელში გამოქვეყნებული, სერგი კაპანაძის წერილი, სადაც ის პარტიაში არსებულ ვითარებაზე წერს. ვინ უფრო რეიტინგულია - მიხეილ სააკაშვილი თუ დავით ბაქრაძე და ვისი რეიტინგი აღმოჩნდა გადამწყვეტი იმ შედეგებზე, რაც ნაციონალურმა მოძრაობამ საპარლამენტო არჩენვებში აიღო - ეს კიდევ ერთი საკითხია, რაზეც კაპანაძე საკუთარ განცხადებაში საუბრობს. განცხადების პარალელურად პარტიაში დაპირისპირებას არა, თუმცა აზრთა სხვადასხვაობას ადასტურებს პარტიის წევრთა ნაწილი. ნაწილი კი კაპანაძის მსგავსად საკუთარ მოსაზრებას სოციალურ ქსელში აქვყნებს და ნაციონალურ მოძრაობაში არაფორმალურ, დე ფაქტო და კლანურ მმართველობაზე საუბრობს. თამარ წიკლაური დეტალებით
მე-9 მოწვევის პარლამენტის პირველი სხდომის გამართვამდე ბოლო კონსულტაციები გაიმართა ქართული ოცნების ოფისში. პარტიის აღმასრულებელი მდივანი ირაკლი კობახიძე პარლამენტის კომიტეტების თავმჯდომარეობის კანდიდატებს შეხვდა. შეხვედრის მთავარი თემა საორგანიზაციო საკითხები იყო. დეპუტატების თქმით, განიხილეს პროცედურული საკითხები, მათ შორის სპიკერის, ვიცე-სპიკერების, ფრაქციებისა და კომიტეტების თავმჯდომარეების არჩევის თემები. დღევანდელი შეხვედრის შემდეგ ცნობილი გახდა, რომ მმართველი გუნდი პარლამენტში 3 ან 4-ი ფრაციის შექმნას გეგმავს.
რა აუფასურებს ლარს და აქვს თუ არა მთავრობას ეროვნული ვალუტის დასტაბილურების გეგმა - მთავრობის ადმინისტრაციამ სპეციალური განცხადება გაავრცელა, სადაც სამოქმედო გეგმის ცალკეულ მიმართულებებზეა საუბარი. განცხადების მიხედვით, მთავრობამ ეროვნულ ბანკსა და საერთაშორისო სავალუტო ფონდთან ერთად შეიმუშავა გეგმა, რომელიც რამდენიმე ძირითად ცვლილებას ითვალისწინებს. როგორ აპირებს მთავრობა ეროვნული ვალუტის გამყარებას - გიორგი კობერიძე ჩაგვერთვება დეტალებით
ღვინის დაგემოვნება, არყის გამოხდა, ჩურჩხელების ამოვლება და პურის ცხობა - მედიის წარმომადგენლები რიგით 13-ე მედიატურის ფარგლებში კახეთს ეწვივნენ. ტურიზმის ეროვნული ადმინისტრაციის ორგანიზებით, “გაიცანი საქართველოს” კამპანიის ფარგლებში მედია ტურში 30-მდე ჟურნალისტი მონაწილეობდა. პროექტი მეორე წელია გრძელდება. მისი მიზანი საქართველოს ტურისტული პოტენციალის წარმოჩენა და შიდა ტურიზმის პოპულარიზაცია. გიორგი მანჯავიძე დეტალები.
კავკასიაში ერთ -ერთი უდიდესი წიგნსაცავი, სადისკუსიო კლუბი და ლიტერატურული კაფე - ეროვნული ბიბლიოთეკის ინიციატივით ქუთაისში ნიკეას ქუჩაზე საგანმანათლებლო ცენტრი გაიხსნება. ინოვაციური პროექტის იდეა, ეროვნული ბიბლიოთეკის დირექტორს ეკუთვნის, რომლის განსახორციელებლად ეკონომიკის სამინისტროსგან შენობაც მიიღო. როდის გაიხსნება წიგნთსაცავი, რა პროექტს გეგმავს ეროვნული ბიბლიოთეკა ქუთაისში და როგორია სტუდენტების მოლოდინი, ნახეთ ჩვენი რეპორტაჟი კავკასიაში ერთ-ერთი უდიდესი წიგნსაცავიდან.
ახალქალაქში, სოფელ კუმურდოში პირველი ცენტრალური სახელმწიფო სტრუქტურა საზოგადოებრივი ცენტრი გაიხსნა, რომელიც სოფლის მოსახლეობას სახელმწიფო და კერძო სექტორის 200-ზე მეტ სერვისს სთავაზობს. საზოგადოებრივი ცენტრის გახსნით სოფელში არა მხოლოდ საჯარო სერვისები, არამედ „მაგთისა“ და „ლიბერთი ბანკის“ მომსახურებაც ხელმისაწვდომი გახდა. პროექტის ფინანსური მხარდაჭერა, ევროკავშირს ეკუთვნის. გახსნას იუსტიციის მინისტრი თეა წულუკიანი ესწრებოდა.
შინაგან საქმეთა მინისტრის ინიციატივით, დანაშაულის პრევენციის, მომხდარ დანაშაულზე ოპერატიული რეაგირების, ადმინისტრაციული სამართალდარღვევების გამოვლენისა და აღკვეთის, ასევე, სატრანსპორტო ნაკადების მართვის და უტყუარი მტკიცებულებების მოპოვების უზრუნველსაყოფად ახალი პროექტი -„უსაფრთხო ქალაქი, უსაფრთხო რეგიონი, უსაფრთხო ქვეყანა“ დაიწყო.. ახალი პროექტის ფარგლებში გათვალისწინებულია, მთელი ქვეყნის მასშტაბით, პოლიციის მიერ წინასწარ განსაზღვრულ ადგილებში, ვიდეოანალიტიკური პროგრამებით აღჭურვილი ე.წ. „ჭკვიანი კამერების“ დამონტაჟება, მათი ჩართვა შს სამინისტროს ერთიან ქსელში და ერთობლივი ოპერაციების ცენტრის მიერ ვიდეოანალიტიკური პროგრამების გამოყენებით ამ კამერების უწყვეტი მონიტორინგი.
თბილისის მერიამ მდინარე ვერეს კალაპოტის ფორმირების პირველი ეტაპი დაასრულა. პროექტის მიხედვით, მდინარის წინა მხარეს დამცავი საფარი მოეწყო. დასრულდა "მზიურის" მიმდებარედ კალაპოტის გაგანიერებაც. უფრო კონკრეტულად, რა სამუშაოები ჩატარდა რისკის შესამცირებლად და უზრუნველყოფს თუ არა მოწყობილი ინფრასტრუქტურა მდინარე ვერესგან მომდინარე საფრთხეების შეკავებას?! დედაქალაქის მერიის პროექტი და ექსპერტთა შეფასებები ნახეთ მარიამ სეთურიძისა და გიორგი კიკვაძის რეპორტაჟში.
მაღალმთიან აჭარაში მოსახლეობა ხეობიდან გასახლებას ითხოვს. ხულოს რაიონის სოფელ ყინჩაურში 60-მდე ოჯახი შიშობს, რომ ხულოსა და შუახევში მშენებარე ჰესის ერთ-ერთი გვირაბი, რომელიც ამ სოფელზე გადის, სოფელს დამეწყვრის საფრთხეს უქმნის. ადგილობრივები ამბობენ, რომ სოფელში გაჩნდა ნაპრალები, დაშრა წყალი და მოსავლის რაოდენობამ იკლო. ის, რომ სოფელში მეწყერსაშიში ზონები არსებობს, ხულოს მუნიციპალიტეტის მიერ დაკვეთილი გეოლოგიურ-გეოფიზიკური დასკვნაშიც წერია. ამის მიუხედავად, ხულოს მუნიციპალიტეტში აცხადებენ, რომ ეს გასახლების აუცილებლობა არ დგას და სოფელს საფრთხე არ ემუქრება. დეტალები რეპორტაჟში მაღალმთიანი აჭარიდან.
კომპანია საქართველოს დაზარალებული მეანაბრეების აქცია - საინიციატივო ჯგუფის ნაწილი კომპანიის დამფუძნებელს შეხვდა, თუმცა, კონკრეტულ სამოქმედო გეგმაზე ვერ შეთანხმდნენ. დაზარალებული მეანაბრეები აცხადებენ, რომ შეკითხვაზე, რა სქემით მოხდება ფულის დაბრუნება პასუხი ვერ მიიღეს, ხელისუფლებას კი დახმარების თხოვნით უკვე მიმართეს. დღესვე დაზარალებულებმა აქცია ეროვნულ ბანკთან გამართეს. საქმეს ფინანსთა სამინისტროს საგამოძიებო სამსახური იძიებს.
მსოფლიოს 160 ქვეყანასთან ერთად საქართველო გლობალური მეწარმეობის კვირეულს მასპინძლობს. ინიციატივა მეწარმეობის პოპულარიზაციისა და სამეწარემო საქმიანობაში ახალგაზრდების ჩასართავად მათი წახალისებისკენ არის მიმართული. მიზანი სტარტაპების პოპულარიზაცია და მიღწეული წარმატების დამწყები ბიზნესმენებისთვის გაზიარებაა. რაზეა გათვლილი სამეწარმეო საქმიანობის კვირეული და რა ინფორმაციას მიიღებენ ტექნოპარკში ბიზნესით დაინტერესებული მოქალაქეები? ნიკა მუკბანიანი, გოჩა მერაბიშვილი დეტალებით.
საქართველოს მთავრობამ ტურიზმის მსოფლიო ორგანიზაციის გენერალური მდივნის თანამდებობაზე ზურაბ პოლოლიკაშვილი წარადგინა. პოლოლიკაშვილი, გიორგი კვირიკაშვილმა მინისტრთა კაბინეტსა და დიპლომატიური კორპუსის წარმომადგენლებს გაააცნო. საერთაშორისო ორგანიზაციის ასეთ მაღალ თანამდებობაზე, საკუთარ კანდიდატურას საქართველო პირველად წარადგენს. ზურაბ პოლოლიკაშილი, იყო საგარეო საქმეთა მინისტრის მოადგილე და ეკონომიკის მინისტრიც, ამჟამად კი ესპანეთში საქართველოს ელჩია.
საქართველოში ორდღიანი ვიზიტით რუსი ბიზნესმენები იმყოფებიან. რუსეთისა და საქართველოს ბიზნესწრეების წარმომადგენლების შეხვედრა უკვე გაიმართა. რუსი ბიზნესმენების განცხადებით, ისინი დაინტერესებულები არიან სოფლის მეურნეობით, ასევე სატრანსპორტო და ჯანდაცვის სფეროებით. ვიზიტის დეტალებსა და შეფასებებს ლიკა ალელიშვილი გაგვაცნობს.
ევროპის ორ ქვეყანაში ჩატარებული საპრეზიდენტო არჩევნების მოერე ტურში რუსეთთან დაახლოების მომხრე კანდიდატებმა გაიმარჯვეს. კიშინოვის ქუჩებში უკვე დაწყებულია საპორტესტო გამოსვლები, ბულგარეთში კი არჩევნების შედეგებმა შესაძლოა ვადამდელი საპარლამენტო არჩევნები და პოლიტიკური კრიზისი გამოიწვიოს. ქვეყნის პრემიერმა თანამდებობის დატოვების შესახებ განცხადება უკვე გააკეთა. მოლდოვისა და ბულგარეთის ახალი პრეზიდენტების დაპირებებს ქეთი ჩოხელი გაგაცნობთ.
ევროკავშირის საგარეო საქმეთა მინისტრებმა ბრიუსელში გამართული შეხვედრის შედეგად “აღმოსავლეთ პარტნიორობის” შესახებ ერთობლივი განცხადება მიიღეს. დოკუმენტის მიხედვით, ევროკავშირის საბჭო საქართველოსთან, მოლდოვასა და უკრაინასთან ასოცირების შეთანხმების განხორციელებაში მიღწეულ პროგრესს მიესალმება. ამავე დოკუმენტის მიხედვით, ეს ევროკავშირთან პოლიტიკური ასოცირებისა და ეკონომიკური ინტეგრაციის დაჩქარებას უზრუნველყოფს. ამასთან, საგარეო საქმეთა მინისტრები ხაზს უსვამენ საქართველოსა და უკრაინის ვიზალიბრალიზაციის პროცესების დროულად დასრულების მნიშვნელობას.
ვინ რა თანამდებობებს დაიკავებს ახალი მოწვევის პარლამენტში უკვე ცნობილია. ქართულ ოცნებაში აცხადებენ, რომ ყველა კანდიდატს გუნდის სრული მხარდაჭერა აქვს. ნაციონალურ მოძრაობა კი შიდა კონსულტაციებს განაგრძობს და უახლოეს დღეებში გახდება ცნობილი, ვინ იქნებიან წარდგენილნი საპარლამენტო თანამდებობებზე. პატრიოტთა ალიანსი პარლამენტის ვიცესპიკერის პოსტზე ირმა ინაშვილს წარადგენს. მიშა ფეიქრიშვილი არკვევდა როგორ ნაწილდება საპარლამენტო თანამდებობები მე-9 მოწვევის პარლამენტში.